تحدي الـ 30 يوم مع عدسات أكيفيو جونسون أند جونسون ♥

تحدي الـ 30 يوماً مع عدسات أكيفيو من جونسون أند جونسون

راح يكون تحدي ممتع جداً معاي وأبغاكم تشاركوني التحدي عشان راح أكتب تجربتي كل أسبوع مرة خلال شهر - 30 يوم - وكل أسبوع راح يكون تحدي جديد مع عدسات أكيفيو جونسون أند جونسون  .

تحدينا اليوم بالتعاون مع مركز البدر للبصريات

التحدي الأول بيكون أو خلونا نقول يوم تعريفي واللقاء الأول بيني وبين العدسات الجديدة ههههه ، طبعاً رحت ع أساس الموعد الساعة 5 عصراً عشان أقابل الدكتور ويعطيني العدسات ويكشف علي ويشرح لي ، دخلت المحل ودخلوني عند الدكتور وبالبداية يكشف على عيونك ويشوف هل عندك انحراف أو ضعف نظر أو طول نظر وكل شيء يخص العيون ماراح أتعمق فيها لأنها مو موضوعنا .

قالي أنا مصابة بضعف النظر مع انحراف بسيط * الانحراف اللي هوا الحور والشاعر اللي قال والعين التي في طرفها حور مدري حاجه زي كذا كان يقصدني يعني إيش يعني أنا جميلة يعني عيوني حلوة خلاص أمزح أمزح ما أقدر ما أمزح  هههه*  المهم لا تصدقوني بسالفة الانحراف هو نفسه الحور ماعرف والله بس أكيد خطأ ،المهم فاطلع عندي ضعف النظر يختلف في عيوني الثنتين يعني مو متساوي ، عيوني اليمين 0.50- واليسار 0.75- ، في ناس ممكن مايشوفوه كثير ، بس والله أنا أشوفوه كثير ونعمة البصر نعمة نعمة من ربي ، جداً أتنرفز لو شفت الأشياء البعيدة مشوشة بالذات لو كنت بالشارع وأبغى أقرأ أسماء اللوحات وأسماء المحلات ما أشوف وما أقدر أقرأها ، ولا مثلاً أتفرج بفيلم مترجم ما أقدر أشوف الترجمة لو جلست بعيد عن التلفزيون ،  بعد كذا جاب لي العدسات الجميلة مرة كنت متحمسة أشوفها لأن زي ماقالي هي آخر شيء نزل من شركة أكيفيو جونسون أند جونسون.

One Day Acuvue Tru Eye by Johnson & Johnson

هذه العدسات اللي أعطاني إياها عدسات شفافة تستخدم لمرة واحدة فقط يعني حقت يوم وتترمي ، أعطاني علبتين علبة لعيني اليمين وعلبة لعيني اليسار لأن نقص الدرجات يختلف في الثنتين ، وكل علبة تحتوي على 10 أزواج يعني تكفي تقريباً لعشرين يوم ، العدسات فيها ميزة وهي العدسة الواحده تحتوي على ماء بنسبة 46% يعني زي ماقالي ماراح أحس بالجفاف أبداً مليانه ترطيب ، سألني هل استخدمت نوع من قبل لنفس الشركة قلت له إيوا قالي وهل كنتي تستخدمي معاها قطرات مرطبة قلت له إيوا ، قالي هذه راح أحبها أكثر وماراح تتعبني وماراح تنشف أو أحتاج إني أستخدم مرطب إلا في حالة وحدة راح أذكرها لكم بعدين ، بعدين سألني إيش مشكلتك مع العدسات عموماً يعني هل عندك مشاكل ؟ قلت له ضربت ع الوتر الحساس *قلب مكسور* قلت له عندي مشكلة مع كل عدسات العالم اللي تستخدم مثلاً لـ 3 شهور ولا دائمة وبالذات الملونة تحمر عيوني وتتحسس وتغبش ومايصير الشخص اللي قدامي يشوف غير دموع دموع ، وحتى لو صادف يوم ومادمعت عيني أو تحسست إلا ماتغبش يعني التغبيش لازم لازم ، قالي طيب هذه المشكلة يعاني منها ناس إللي عندهم حالة تحسس في العين يعني حساسية أو شيء من هذا القبيل ، فماراح يناسبني إلا نوع واحد إللي هي يوم وتترمي ، قالي ما أشتري أي نوع يدوم لأسبوعين مثلاً أو 3 شهور لأنها راح تغبش علي وتدمع و... إلخ من المشاكل ، لو بغيت شفافة أخذ زي هذا النوع ولو بغيت الملونة أيضاً نفس الشركة توفر عدسات ملونة ، طبعاً استغربت أول مرة أعرف إنها توفر ملون ، قلت له طيب ممكن أشوف الملون لو متوفر و أبداً ماقصروا وجاب لي الملون وخيرني بين لونين عسلي ورمادي وأخترت الرمادي .

هي نفس الشيء يوم وتترمي ، وأعطاني لكل عين مقاس خمس حبات ووحدة حالياً بعيني إحم إحم ، زي ماتشووفو اللون بس من برا يعني كتحديد ومن جوا شفاف ممكن نسميها عدسات شفافة بتحديد ملون ، واللون مو لون رمادي فاتح رمادي غامق ، واللي لونها عسلي قالي هذه عدسة الغزال أتوقع حاجة زي كذا يسموونها يعني من جوا رسمتها العدسة توسع العين وتكبرها وذكرتني بعدسات الإنيمي ، بس هذه لا اللون من برا زي التحديد وأيضاً ذكرتني بعدسات الإنيمي يعني اللي عيونها صغيرة جداً محظوظة ، لأن العدسة كبيرة وتكبر العين ولونها يناسب العيون الفاتحة أكثر من الغامقة بما إني أملك لون عيون غامق وعيون واسعة  .

ففتحت الموقع حقهم ولقيتهم موفرين العدسات الملونة والحلو إنهم حاطين لك خيارات مثلاً إيش لون عيونك وكيف بتطلع عليك العدسات اللي تبغيها لو لبستيها مرة عجبتني الحركة ، بس العدسات المعروضة بالموقع مو نفس اللي معاي ماأحسها تشبهها راح أسأل عنها بعدين إن شاء الله لو عجبتكم وحابين منها إكتبوا لي تحت بالتعليقات 

 شوفي موقعهم وكيف لون العدسة اللي تبغيها بيطلع على عينك : هنا

بعد كذا قالي أنسب شيء راح يناسب عيني اللي هي العدسات لاستخدام مرة واحدة ، وطبعاً لما قالي كذا مصدقته مية بالمية ، لأني مجربتها العدسات من قبل وأكثر شيء مناسب عيني من التغبيش والاحمرار وماجاوره هي العدسات اللي تستخدم لمرة واحدة فقط وتترمي ، بعد كذا قالي ع نصائح عامة راح أذكرها لكم ألحين ، عشان تتجنبي كل المخاطر الصحية لعينك وعشان تقدري تشوفي وماتغبش عليك العدسات أو تحمر عيونك لازم عليك تسوي :

♥ أول شيء تغسلي يدك بالموية والصابون وتتأكدي من أن أي كريم أي مستحضر بيدك راح حتى الصابون نفسه ، وتنشفينها بمنديل نظيف مايكون من النوع اللي يطلع شعيرات صغيرة تلصق بيدك وبعدين عينك وبعدين تجرحك بعينك وتحمرها وتحرقها .

♥ تفكي العلبة وتطلعي العدسة براحة إصبعك يعني مو بظفرك عشان ماتخدش العدسة وتقطعها ، تطلعيها وتنتبهي ماتكون مقلوبة زي كذا تكون على الجهة الصح 

الشكل اللي ع اليمين هو الشكل الخطأ والشكل اللي ع اليسار هو الشكل الصح ، يعني لو كانت بشكل محدب زي اللي باليمين كأنها فنجان معناتها مقلوبة ولو كانت مستوية ومرتخية زي اللي باليسار معناتها صحيحة .

♥ بعد كذا كان راح يعلمني كيف ألبس العدسة بس قلته لا أعرف هههه فلو كنتي ماتعرفي أفتحي على فيديوهات باليوتيوب وحاولي تتعلمي كيف تركبيها أو شوفي الفيديو هذا من نفس الشركة مسوينه باللغة العربية، اضغطي هنا .

♥ لو استصعب عليك تركيبها وطولتي وبغيتي شيء ينظف العدسة مرة ثانية لا ترجعيها بنفس المحلول اللي بالعلبة ، لا حطي العدسة بطرف إصبعك وخذي محلول العدسات المتوفر عندك ورشي عليها وأرجعي إلبسيها.

♥ لاتستخدمي الموية أبداً في تنظيف العدسات  .

♥ في حال لو لبستي العدسات بجو حار وغبار وتراب زي حالتنا ، لازم تلبسي نظارة شمسية عشان تحمي العدسة وعينك منهم .

♥ في حال لو حسيتي العدسة نشفت خلال اليوم قالي أفضل شيء ممكن يستخدم هو قطرات ريفرش تحصلوها بالصيدليات تقطري فيها عينك فوق العدسة وبإذن الله ترجع زي ماكانت وتترطب عينك ، وأبداً لا تستخدمي محلول العدسات لأنه مو مخصص لترطيب العين.

♥ إنسي فكرة تنامي والعدسات بعيونك .

♥ لو كانت عيونك من النوع اللي لو لبستي أي عدسة تغبش وتحمر مالك إلا عدسات يومية تستخدم لمرة واحدة فقط وتترمي هذا الحل الوحيد لعيوننا .

* العدسات اللي تكون معاك لوقت أطول تحتاج لعناية أكثر *

 { لو حابة تعرفي أكثر عن نفس عدسات أكيفيو جونسون أند جونسون لهم قناة خاصة في اليوتيوب مرة ممتعة وهذا فيديو من قناتهم }
 

طبعاً هم قالولي هذا يعتبر تحدي اممم أشوفه تعريف واللقاء الأول بيني وبين العدسات ، بإذن الله التحدي الأسبوع الجاي راح يكون حماااسي مرة مرة متحمسة له ، إنتو بس خليكم معاي وجنبي لاتروحوا بعيد عشان أول ماينزل البوست تكونوا متحمسين زي ، كل شيء راح أتكلم عنه أكثر وبصراحة وبدون مجاملة .

لو حبيتوا تجربوا العدسات قبل أكتب تجربتي عنها أو تبغوها أوي شيء ، تلاقوها في مركز البدر للبصريات

إيميلهم : al-badr@albadr-optical.com 

موقعهم : www.albadr-optical.com

جدة / شارع التحلية / ت : 6673339

الرياض / ت: 4617157

الخبر/ ت : 8815600 

موقع عدسات أكيفيو جونسون أند جونسون : 

http://www.acuvuearabia.com

جداً مبسوطة بالبرنامج والتحديات وإن شاء الله أشوفكم بالتحدي الجاي ♥

هل قد جربتي العدسات الشفافة ؟ أية نوع وأية شركة ؟

في حال لو جربتي نفس العدسات اللي أعطوني إياها كيف كانت تجربتك معاها ؟

هل قد جربتي العدسات الملونة من نفس الشركة ؟ كيف كانت معاك ؟

♥