فستان ناعم من ❣ FG4 London

أهلين وسهلين ، عارفة إني تأخرت عليكم بالتدوينة ، بس السبب كان بإني كنت أبحث وأدور على منيكان يعرض لكم الفستان بشكل أوضح ! ، بس للأسف الشديد طول ذيك الفترة وأنا أدور مالقيت وبنفس الوقت لقيت مانيكان مرة كيوت بس أخاف ماتدخل فيه ملابسي ههههههه ، لأنه عريض مرة وملابسي يعني تترواح مابين الإكس سمول ومايجاوره ، المهم راح أوريكم الفستان بما إن أغلبكم وده يشوفه بشكل مستعجل ، الفستان كان يوماً من الأيام أدخل على محلي المفضل للفساتين الناعمة وبس كذا أبغى أتفرج على جديدهم وأشوف هذا الشيء اللي خطف قلبي من نظرة وحده ، وكمان أخذته بدون تردد ودفعت عليه ورحت البيت وكلي ثقة بأنه بيطلع حلو وماخيب ظني أبداً ، الفستان من محل إف جي فور لوندون ، بانطقه زي اللبنانين هههههه ، أخذته قبل قرابة الشهر ، ورحت قبل أمس وحصلته لسه موجود :) .

شكل الفستان بشكل عام ، قصير وعليه تُل يهيأ لك بأنه فستان طويل ، من تحت الأساس لون وردي أو كورال ، وعليه دانتيل سكري أو بيج ، وبعدين من أسفل من الخصر تُل بنفس درجة الدانتيل ، مره ناااعم وع قولة أمي تحسي وإنتي لابسته كأنك برينسس ، ناخذ صور من قريب عشان تشوفوا :

من عند الصدر يجي على شكل V هذه القصة أنا ما أحبها ليش ؟ لأن أكتافي ضيقة ولما ألبس بنفس ذي القصة أحسها تضيق أكتافي وتصغرها أكثر ، زائد بأن الصدر يصير واضح وهذا الشيء يزعل أمي ههههه ، بس أمي مشت لي سالفة الصدر والتل المخيط فوق قصة V على شكل دائري مضيع الهيئة شوي ، فطلع مره حلو ، مركبين عليه ماعرف ايش يسموونه بس شايفين الورد أو تطريز لا خطأ مدري اش اسمها بس كأنها قطع دانتيل مقصقصة لونها كورال أيضاً بنفس قصة الـ V ! ، من تحت يجي قصير زي منتم شايفين أنا تقريباً وصل لي نص فخذي ولما أجلس يرتفع أكثر ! ، بس عليه التُل فأيضاً مغطي أكثر وطالع مره حلو .

 الصورة اللي أول ! من عند الصدر واللي تحتها من أسفل يكون عليه التُل .

 أخذت أصغر مقاس 6 ، وطالع مره مضبوووط من كل النواحي حتى الطول لما لبست كعب مرة طويل طويل فطلع حلو ، عادا من ناحية وحدة وهي زي ماذكرتها لكم من عند الأكتاف شوي طايح لأن أكتافي ضيقة بس لما لبست برا بوش أب حسيتها رفعت شوي وشقت من عند الأكتاف بس يظل مو مرة واضح لأني أفك شعري ويغطي .

السعر : بـ 349 ريال سعره مره حلو وبمتناول الآيدي ويستحق :) .

بإماكانك تلبسيه بمناسبات كبيرة ولا صغيرة يعني زي حفلات أو سهرات 

والفستان أتوقع إنه كان من الكوليكشنات الصيفية / الربيعية  .

فروع المحل : مجمع العرب الدور الثاني 

الأندلس مول الدور الأول 

لو في فروع ثانية قولوا لي لأني ماشفتهم غير بهذول المولين ❤

المحل بشكل عام يعجبني كثير وغالباً موديلاته تجي محبوكة مقاس 6 علي وتعجبني كثير .

إن شاء الله تكون التدوينة ساعدتكم وانبسطتوا فيها :) .

❤