أفضل ست أرواج أستخدمهم للخريف / والشتاء ♥

{ أفضل ست أرواج أستخدمهم للخريف / والشتاء }

المفروض هذه التدوينة تنزل قبل أمس بس لسوء الحظ جتني الويك ويك وخلتني طريحة الفراش ، يالها من مقدمة !! 

مايهم السطر اللي فوق بس التدوينة هذه مرة كنت متحمسة لها وحبيت أطرحها ألحين قبل يخلص الخريف هذا إذا ماخلص بس لا ما أتوقع ! المهم هذه الأرواج أستخدمتهم بكثرة الفترة اللي طافت وراح أستمر أستخدمهم لين يخلص الشتاء ، الألوان تترواح مابين ألوان قوية وغامقة وخفيفة وناعمة تناسب ليل ونهار ، الألوان اللي اخترتها مرة طالعة عليّ جميلة ، فإنتي قبل تشتريها لو عجبتك لازم تجربيها وشوفي هل بتناسبك أو لا ؟! هل تناسب شكل شفايفك أو الاندر تون تبعك ، أنا شكل شفايفي يسمونها شفايف العصفور أتوقع المهم منفوخة وتشبه القلب وصغيرة و الأندر تون حق بشرتي محايد مائلة للدافيء أكثر، إذا تبغي تعرفي كيف تختاري درجة الروج المناسبة للون بشرتك أنصحك تقرأي تدوينة Catwalk Glam هنا ، طبعاً كل وحدة وذوقها وكل وحدة واختياراتها أنا عن نفسي أوكي باتكلم عن نفسي وكيف أفضل ألون شفايفي فيهم مو لازم أحد زيي ولا لازم أحد يصير زيي ولا أصير زي أحد !! أكيد كلنا مختلفين ♥ .

ألحين راح أقولكم الألوان اللي أستخدمها فرضاً بالسهرات أو عزايم بالليل أو أي طلعة وقتها يكون بالليل ♥

     YSL rouge volupté in forbidden burgundy-12

 لون برغندي جميل ، اللون أخذته قبل يمكن أسابيع قليلة ، أول ماحطيته ع شفايفي شفته لون جداً راقي ، قلوسي مو مطفي ، لونه أحسه عنابي برغندي بنفسجي يعني كل الدرجات هذه جامعينها مع بعض ، اللون جداً غني بيجمنتد لما تحطي طبقة وحدة يعطيك لون عنابي متوسط ولو أضفتي طبقة ثانية يغمق اللون ويصير لك برغندي غامق وكل مابغيتي يغمق اللون زودي طبقة ، بما إن الروج قلوسي يعني كريمي يعني مو مطفي وناشف ، لازم أستخدم محدد قبله عشان مايخرج برا الحدود ويخربط لي الرسم ، مايحتاج تاخذي أي لون محدد ثاني لأنه بنفسه غامق وبنفسه يمديك تسوين منه محدد ، فقط أستخدم فرشاة الشفايف من سيجما ، وأعبي لون من نفس الروج وأحدد بيه شفايفي ، ريحته حلوة ريحة روج ههههه ريحة حلاوة سويت ماتزعج ، تعليبته شيك وحلوة ، بس أحس الحركة قاهرتني لما تجي ترفعيه لفوق عشان تستخدميه أحسه ينطحن من الجوانب جوا يعني أتخيل كل ماطلعته ودخلته ينطحن من الجوانب ويخلص بسرعة *فيس يبكي* مدري هل هذا شيء صحيح ولا بس يتهيأ لي راح أكتشفه مع الأيام ، ثبت معاي أكثر حد كان 4 ساعات بدون مايخف وبعد كذا بدأ يخف اللون تدريجاً ، اللون جداً جميل ومع مكياج بدرجات اللون البني آآآع يطلع خرافي ، مرة حبيته وأنصحكم تجربونه ♥ .

السعر : 180 ريال ، تلاقوه بمراكز التجميل الكبيرة .

هذه سواتشات له من مدونات ثانية :

♥♥♥♥

Maybelline color sensational 338 midnight plum

عشان أكون معاكم صريحة ماكنت أحب هذه الدرجة في الأرواج أبداً بس مرة من المرات شفته على ريانا ، وقلبي دق دق دق حن ورأ قلبه هو لا مادأ ولا قال حبييييت ييييت ياهل الهوى توبة أوكي باسكت ، اللون لون موف أرجواني فيه ذرات لمعة فضية صغيرة جداً يعني لما تحطيه يصير اللون أفتح مما هو مبين لك في العلبة ، يعني أول ماتفتحي الروج تقولي أووه غامق مرة بس عشان الذرات الفضيه الموجوده فيه خلته أفتح ممها هو عليه ، بس يظل لون غامق اللون من مجموعة كولور سنسايشنال الجميلة ، صراحة أخذته الشتاء الماضي ، وكنت صابغة شعري بلون بني فاتح جداً ، ولما كنت أحط هذا اللون مع كات آيز آآآآآع يطلع خرافي خرافي مرة جميل وشيك ، بس حالياً لأن شعري رجعته للونه الطبيعي الغامق حسيته إممم مو مرة طالع علي حلو بس أحبه وراح أحطه ، ريحته كورن فليكس أو بسكويت يعني لذيذ ، اللون أول ماتحطيه قلوسي وبعدين تحسيه صار مات ، يستمر معاي لمدة 3 ساعات كحد أقصى وبعد كذا يبدأ يخف ويبهت وتظهر الذرات أكثر كأني حاطه لون أبيض ، اللي شعرها فاتح وجريئة أنصحها تجرب هذا اللون ♥ .

السعر : حول 38 ريال ، تلاقوه بكل فروع سنتر بوينت أو صيدلية بوتس أو مراكز التجميل . 

هذه سواتشات له من مدونات ثانية :

♥♥♥♥

Maybelline color sensational bold matte -Mat6

لون أحمر غامق أو عودي، من مجموعة كولور سنسايشنال الجميلة جداً ، بس للأسف خاصة فقط بشرق آسيا ، أنا درت هنا مالقيته أبداً ولا بفرع *اللي تلاقي زيه ممكن تقولنا تحت بالتعليقات* ، لما سويت بحث عن اللون عشان أجيب سواتشات حصلت الأغلب من شرق آسيا والهند ، عشان كذا ماأتوقع نلاقيه هنا عندنا ، ع العموم اللون جميل وبإذن الله تحصلوا لون مشابه له ، لون عودي غامق جداً لو خلصته ممكن أبكي ، لأنه مات بس ماينشف الشفايف تركيبته عجيبة وتجنن ، كل مازودتي منه طبقة كل ماصار أغمق ، اللون جداً جداً جداً غني بيجمنتد ، يعني طبقة وحدة تكفيك تحصلي اللون ، مافيه أي ريحة ، وبما إنه غامق جداً جلس معاي لمدة 6 ساعات زي ماهو ماشاء الله ، بعد كذا بدأ يخف ، مرة حبيته وبإذن الله تلاقو منه شبيه من نفس المجموعة بأي أقسام ميبلين ♥ .

السعر :  35 ريال من إندونيسيا . 

هذا سواتش له من مدونة ثانية : 

 

♥♥♥♥

أما ألحين راح أقولكم الألوان اللي أستخدمها للنهار لو كنت رايحة مكان مهم أو عزيمة أو أي مناسبة تكون في النهار ♥

Rimmel Kiss of Life Lasting Finish Matte by Kate Moss - 111 

لون أحمر ناري ع أورنج كذا ، أول ماشتريت الروج حسبته بيطلع غامق علي بس لا ، فاتح مرة يعني أحمر ناري ، كلون جداً جميل لو حبيتي تستخدمي لون أحمر بس بالنهار بيطلع فضيع لأنه مات أحمر خفيف مرة مايوجع بالعين ، كتغطية إممم نص ونص لو عندك عيوب بالشفايف راح يوضح تغطيته خفيفة حاولت أحط كذا طبقة بس مدري ماحسيته يزبط ، بعد كذا جربت أحط محدد تقريباً نفس الدرجة وزبط معاي ، مطفي ينشف الشفايف يعني لو حبيتيه لازم تستخدمي قبله مرطب للشفايف ، اللون ما كان غني بالنسبة لي ، ريحته جميلة ريحة حلاوة ، استمر معاي قرابة 5 ساعات بعد كذا صار كأنه أورنج وبدأ يخف ، هل لو خلص راح أرجع أشتريه اممم لا ما أتوقع، بس ألحين حابة إني أستخدمه مع الخريف والشتاء ♥ .

السعر : أخذته وقت تخفيضات بـ 31 ريال ، تلاقوه بكل فروع سنتر بوينت وصيدلية بوتس ومراكز التجميل .

هذه سواتشات له من مدونات ثانية :

♥♥♥♥

  Maybelline color sensational 540 hollywood red

لون لحمي ع أندر تون شوي بني أو محمر ، أيضاً من مجموعة كولور سنسايشنال الجميلة لميبلين ، اللون أدمنت عليه الفترة الي فاتت ، وراح تلاحظون بالصورة إن مابقي منه غير نقطة ، برأيي الخاص سواء كنا بصيف ربيع خريف شتاء لازم يكون من بين أرواجك اللي تستخدميها لون طبيعي ليش ؟ ، لأن معظم الأحيان تجيكي حالات مستعجلة أو تكوني تعبانه ومالك خلق تسوي مكياج لو رحتي مكان أو ماجاورة ، يكون معاك لون طبيعي تستخدميه ، لون حلو ويناسب جميع الفصول ، لو صرت دقيقة هذا اللون يناسب الخريف بس أيضاً يناسب الشتاء وأيضاً الصيف والربيع بكذا أكون ماقدرت أحدد تماماً ، عشان كذا اللون هذا راح أستمر أستخدمه لين آخر الشتاء وأتوقع وقتها بيكون مخلص تماماً ههههه ، اللون جداً غني يستمر معاك لساعات طويلة مابين أربع إلى خمس وست ساعات ، كريمي ماينشف الشفايف ، ريحته يمي يمي ودك تاكليه كأنها حلاوة ، اللون جداً غني بيجمنتد مايوضح عيوب الشفايف ♥.

السعر : حول ٣٨ ريال تلاقوه بكل فروع سنتر بوينت وصيدلية بوتس وجميع مراكز التجميل .

هذا سواتش له من مدونة ثانية : 

♥♥♥♥

NYX matte lipstick tea rose - Mls11

أقدر أقول ختامها مسك ، آآآآع أعشق هذا اللون والروج ، فضيع يابنات ويناسب الشتاء بنسبة 100% ، لون لحمي بأندر تون وردي مزرق ، بنات فاكرين زمان آي سكريم الكرز من جمجوم كان ينباع بنص ريال ، هذاك كان عشقي الأبدي ومازال والله لأن آخر مرة شفته بالبقالة مع أبوي وصرخت صرخة كنت راح أنطرد من البقالة بس تمالكت نفسي ، المهم من كثر عشقي بدرجة الآي سكريم هذاك ، شفت هذه الدرجة بالروج نفسها عشقته والود ودي أجمده بالثلاجه وأكله ، نتكلم أول شيء عن قد إيش هو غني غني غني يعني لون بيجمنتد ، وقد إيش اللون يجنن عليّ ،  اللون لما حطيته يجلس معاي حول 5 ساعات ، متصورين يعني لون زي كذا فاتح وماركته رخيصة كذا يطول أوه ماي قودنس ، المهم أنا بصراحة اللون هذا بيكون من ألواني اللي دايماً معاي ويمكن أروح أخذ 5 وأحط واحد جنب السرير وواحد بالحمام وواحد فوق التسريحة وواحد بالشنطة وواحد بالسيارة ، عشان لو مرة نسيته ما أندم ، يب ما أبغى أندم أخاف أبكي ، لون فضيع أحبك ياخي *طراع* < أعطيته كف هههههه ، المهم روج مات يعطيك لون مطفي ينشف الشفايف شوي ، ريحته كأنها فكس نعناع أو بنزين مدري أية واحد فيهم ، بس أحبه أحبه لاتحاولون أحبه ♥ .

السعر : 25 ريال وقت تخفيضات تلاقوه بجميع فروع سنتر بوينت وصيدلية بوتس ومراكز التجميل .

هذا سواتش له من مدونة ثانية :

* لاحظوا يختلف لونه مع إختلاف الإضاءة لو بنور خافت زي الأولى أو بنور الشمس زي اللي بالنص أو بنور أصفر زي اللي تحت * 

كذا خلصنا أفضل أرواج راح أستخدمهم إن شاء الله للخريف والشتاء ♥ مثل ماقلت قبل تشتريها جربيها يمكن ماتعجبك الناس أذواق ومختلفين ♥

هل قد جربتي روج من الأرواج اللي عرضتها ؟ إيش هو وكيف هو معاك ؟

إيش أكثر روج تحبي تستخدميه خلال الخريف والشتاء ؟

♥