بعض مشترياتي من إندونيسيا ! ♥ Indonesia Haul

ياهلا وياغلا ويامرحبا ترحيبةٍ ترحيبةٍ ترحيبةٍ آآآآآآآ شسمو آآآآآ أوكي أوكي أعترف

أعترف إني دخلت تخصص أدبي وشعري وقصائدي وهذا لا يمت لي بأي صلة

بس دايماً أتحمد ربي مايطلبون منا نكتب قصائد وأشعار لا وبعد بالانجليزي ياحبيبي *فيس يهز خصره ويرقص مصري*

ولا كان جبت العيد دايماً وأبداً *فيس رافع يده للسماء ويدعو إلى الله *

ع العموووم نخش دوغري بالموضوع

اليوم حابه أعرض لكم إش اشتريت من إندونيسيا *فيس قلبه مكسور**فيس مشتاق*

لما رحنا إندونيسيا الشوبينق أو التسوق هناك كان جداً عكس ماليزيا من حيث اللي يعجبني ومن حيث توفر الماركات اللي ماهي موجودة عندنا !!

ماليزيا لما سافرنا قلت أوكي رنا رايحين نتمشى إنسي تسوين شوبينق أوكي أوكي

إندونيسيا قلت أوكي رنا بقي عالسفر 3 شهور ممكن تخزني مبلغ بسيط حق التسوق أوكي أوكي

واللي حصل هو العكس ماليزيا كان فيها كلللل شيء من وإلى بس للأسف ماوعدت نفسي بشوبينق

وإندونيسيا إللي حسيتها شبهه خالية من الأشياء اللي تعجبني ووفرت لي فلوس مالقيت ولا شريت الأشياء اللي ببالي وماتتوفر بالسعودية

ع العموم يمكن كان موجود بس ماعرفت أدور وقبل كل شيء ترا الناس أذواق ممكن ناس لقيت اللي يعجبها بإندونيسيا وأنا لا

يعني ماحنا زي بعض ! *فيس ماد بوزه *

هذه مشترياتي أغلبها من جاكرتا مع إن بنظري أفضل شيء كانت مدينة باندنوق للتسوق بس كنت أأجل وأقول أوكي خليها يارنا بجاكرتا عشان الشنط تعبيها كويس بدل ماأثقل ع نفسي و ع أهلي وندمااانة كثير إني سويتها لأن أسواق باندنوق أفضل من جاكرتا بنظري ، اللي كان حلو بباندنوق في صناعات حلوة حتى لو كانت محلية مش عالمية تحسيها شيء ذوق سواء بأسواقهم العادية أو بالأسواق الكبيرة ، والأوت ليت شيء مره جميل ، أما جاكرتا ضيعت يوم كامل بتعيس الحظ سوق مانغادوا هو كان عبارة عن 3 مباني وخصصنا يوم كامل لها ع أساس نقضي منها ، بس ماعجبني فيها شيء مرررة وضيعنا يوم كامل فيها ولسه مقهوره عليه ، مليان شنط تقليد وليتها رخيصة ماتختلف عن الغالي بشيء يذكر بس بجد تقليد بجدارة ماحد يقدر يفرق بينها وبين الأصلي *فيس ميت ضحك**فيس مايتشمت ع نفسه* والجزم أوه ماي قودنس والله أنا جلست أقول مستحيل تقليد صناعتها شيء خرافي ممتازه بس أيضاً عورني قلبي أدفع عليها وهي مو الأصلي باحط كم قرش زيادة عليها وأخذ الأصلي *فيس مبتسم بقوة* واليوم الثاني رحنا سوقين كان يتوفر فيهم كل الماركات العالمية أقصد بعض الماركات العالمية للأسف كل ماسألت عن محل قالوا مافي ماراح تلاقيه بإندونيسيا مثال ع ذلك سيفورا وأيضاً ماك الجميل ، مع إن والله سويت بحوث كثير عن طريق قوقل لجميع الأسواق والمحلات اللي أبغاها وكتبتها بورقة ولما رحت تفاجئت بأنها محض من خيال كيف كذا !! ياهو !! يا أنا غلطانة يا إنتو !! *فيس يعابط* أوكي كثرت كلام كثير بالمقدمة يلا نشوف إيش أخذت:

{ ساعة بمنبه من Fashion سعرها 35 ريال }

الساعة الجميلة هذه جداً تناسب غرفتي أخذتها من كشك بالدور الثالث أتوقع أو الثاني من سوق تمان أنقريك بجاكرتا ، الكشك جميل جداً وفيه أغراض مرة حلوووة وكيوت وصناعتها جميلة وشيك وذوق ، أنا أخذت هذه الساعة وأختي أخذت ساعة إلكترونية حلوة ورخيصة .

{ كريم تفتيح اليدين من لوكسيتان بنسبة حماية من أشعة الشمس بـ 20 %  سعره 125 ريال }

كريم تفتيح اليدين هذا عرفته من قبل فترة وحدة من صديقاتي أرسلت لي موضوع لكاتبة كيوته تكلمت عنه ومدحته كثير ، طبعاً حكتني إن المنتج ماصار متوفر بالسعودية لأنه كان ليمتيد إديشن يعني لفترة محدودة ، تفجائت كثير لما حصلته بسوق تمان أنقريك محل لوكسيتان ، وقلت لها هل هو ليمتيد إديشن قالت لا عادي بيجينا كثير ، طيب إش معنا إحنا ؟ *فيس مدهوش* قالت مدري ، ولا أنا أدري ، يعني فكرت وقلت ممكن من كثر ماحد يشتري عندهم بس لا المحل كان مليان وكل وحده طالعة بكيس مليان يعني كيف كذا ! مرة مستغربة مدري ، ع العموم باحط لكم رابط تجربة هذا الكريم مع الكاتبة اللي ذكرته وجربته عشان لو حابين تستفيدوا منه ولأن بإذن الله راح أجربه أنا وأقولكم عنه ، عندي سمار مرة خفيف بمفاصلي هذا وأنا ما أترك الترطيب أبداً قبل النوم وبعد ما أصحى بس لأني ماستخدم كريمات تفتيح إلا نادراً جداً ومع الشمس في الرحلة يداتي تسمرت زيادة وتبقعت زيادة *فيس يبكي بقوة * فا قلت لا باشتريه وأجربه

رابط الموضوع : http://cutt.us/p2wU

{ كريم تفتيح الوجه من أفين للبشرة الحساسة سعره 165 ريال }

ماكان في بالي ولا كنت راح أشتريه بس لما تبقعت من الشمس ههههه قلت لا لا لازم وأيضاً قبل تقريباً شهر طلع لي حبتين بخدي اليمين ومن زود شطارتي حكيتها بظفري بدون ماأحس وجرحتها وصارت ألحين أثر غامق وواضح جداً ، وأخواتي كرهوني بنفسي كل شوي روحي إنتي وأثارك اللي بوجهك *فيس قلبه مجروح*فلما دخلت المحل موجود أيضاً بتمان أنقريك كذا الديكور جذبني وخلاني أدخل وأجلس أتفرج وجلست العاملة توريني المنتجات اللي بالمحل كلها مستوردة وكذا ، المهم المحل يابنات إش كبره والمنتجات كم حبة ، يعني هذا المحل بكبرررراه عشان كم منتج مدري كذا حسسوني إنه محل يبيع قطعة ذهب بالألماس النادر جداً ههههه ، فقلت يابنتي اشتريه خلاص وخلينا نجربه يمكن يزبط وتفتح البشرة وأيضاً تروح الأثار - على فكرة أنا ما أجري ورا أي شيء يخليني بيضاء هذا وأنا سمراء قمحية أو خمرية بس دايماً أناشد باللون الموحد وأحلم فيه مايهمني أصير بيضاء أبداً فمو هذا السبب الي خلاني أشتريه - فإن شاء الله يعطينا نتيجة حلوة *فيس عيونه فيها قلوب *

{ أرواج بولد مات من مايبلين رقم 2 و رقم 6 سعرهم 35 ريال للواحد

 آي لاينر أسود من مايبلين سعره 26 ريال ، ماسكرا ذا مق نام فوليوم سعرها 45 ريال }

آخ *فيس مقهور مكسور* أول شيء قد كتبت لكم بالانستقرام إنو ماحصلت مكياج عندهم صح أوكي بالمعنى الأصح مالقيت مكياج معروف عندهم كل اللي عندهم اللي يجيك كوري صيني وهذه الماركات أبداً ماتناسب وجيهنا العرب ههههه ، يصير كأني ضاربة طحين بوجهي والألوان فاتحة والأوراج دقيقة وتختفي ، المهم بسوق إندونيسيا بلازا يعتبر من أفخم الأسواق بجاكرتا وكله ماركات عالمية ، وأنا ماشية شفت صيدلية قلت الله كأنها صيدلية بوتس ودخلت ولقيت مايبلين قدامي قلت يلا أشوف إش عنده ، تفاجئت مية انفجااااء ههههه ، بأن مايبلين اللي عندهم غير عنا ، يعني أقصد منتجاته غير عن منتجات مايبلين اللي يجينا ، حتى التعليب غير بس يمكن نفس المحتوى بس التعليب يفرق مدري، المهم أخذت هذه الروجين اللي ندمااااانه قد شعر راسي إنو ماأخذت الألوان الباقية ، هي تعتبر من مجموعة كولور سنسيشنل الأول بولد مات أحمر والثاني أورنج تقريبا ، جميلة وحبيتها وثباتها جلس معاي 7 ساعات ، المهم راح أسوي ريفيو عنه قريب بإذن الله ، والآي لاينر جميل سواده غامق بس لسه ماجربته كثير ، والماسكرا لحد ألحين مافتحتها ، فالمنتجات حق ميبلين حقهم هههههه تقريباً أقدر أقول تناسبهم أكثر شرق آسيا ، لأن حصلت كريم أساس قلت أجربه وجلسنا ساعة ندور درجتي ماحد تحطم ، فقلت أوكي أصلاً هو مصنوع لكم عشان يناسبكم مش لنا هههههه وسلامتكم .

هذه أرقام الأرواج للي حابة تتشتري زيهم لو راحت ، وأنصحك تاخذي المجموعة كلها *فيس بريء*

{ فيتامينات للشعر من Ellips سعر الحبة يتروايح مابين ريالين لـ 10 ريال }

أيضاً من الصيدلية ، أخذت هذه كان عليها عرض فيتامينات للشعر كانت الحبة أتوقع بخمسين ريال وصار عليها تخفيض وأخذت كم حبة ، وحدة لتنعيم الشعر ، وحدة لتلميع الشعر الأسود بما إني صبغت شعري ، وحدة لتتقصف وهكذا ، إن شاء الله تكون مفيدة مو بس دعاية وكذا .

{ ماسك للشعر من TRESemme سعره بحدود 50 ريال }

الصيدلانية مرة مدحته لي قلت أوكي أخذه لأن أصلا الشركة معروفة ، وتمنيت ألاقي حامي الشعر من نفس الشركة قد ماشفت عليه مدح باليوتيوب بس مافي مشكلة معوضة يارب *فيس قلبه مكسور* ، بإذن الله أجربه ويكون فيه نتيجة إن شاء الله }

{ مصحح الشعر أو مغذي من Sunsilk للشعر الأسود سعره بـ 8 ريال }

أنا أخذته كذا بدون تفكير قلت أجربه غير إني مرة أعشق صانصيلك والله كان شعري بخير لما كنت أستخدمه بس مع تطورهم للمنتجات ماصارت تناسبني *فيس حزين * فقلت ممكن هذا يجي منه زي منتجاتهم القديمة .

{ أساور يد الحبة بريال ونص }

الأساور هذه أخذتها من مول في جزيرة بالي أتوقع تجي كمان بكلات ، رخيصة وألوانها عجبتني صيفية فاقعة واو ، المهم طبعاً أخذتها عشان سبب زي ماكتبت لكم بالانستقرام ، إنها جايه ع مقاس معصم يدي بالضبط يااااااي *فيس يضرب كفكم * ليش لأن بطبيعة شرق آسيا عظمتهم تجي نحيفة فهذا الشيء جاء ع مقاسي ، مرة انبسطت وقلت ياشيخه أخذ أبو شكلك ، وبس مرة مبسوطة .

{ ماسك للوجه من Activa

 الأبيض لتفتيح البشرة ، الأسود لتصفية البشرة ، الأزرق بالكولاجين سعر الواحد فيهم 10 ريال }

أخذتهم من نفس الصيدلية بسوق اندونيسيا بلازا ماسكات للوجه كان عليها عروض خذي واحد واحصلي ع واحد مجاناً ، أخذت كل الثلاث أنواع عشان أجربها ، غير إنها رخيصة وكذا ، وتفيد في حالات الكسل لو مابغيتي تسوي تنظيف بشرة بمكان أو تسوي ماسك طبيعي بالبيت هذه مرة تفك أزمات ههههه .

{ ماسكات للوجة من Ovale بالليمون والخيار والثوم أتوقع سعر الواحد بـ ريالين }

أخذتهم من نفس الصيدلية بسوق اندونيسيا بلازا ع أساس أيضاً نفس الشيء لو بغيت أسوي تنظيف بشرة ومالي خلق أسويه بالبيت أو شيء زي كذا فا تفك أزمات .

{ ماسك الورد الأحمر Bali natural face and bodu mask rose بـ 20 ريال }

همممم هذا الماسك للوجة والجسم كميتة كبيرة جداً أخذته من جزيرة بالي ، طبعاً جزيرة بالي عبارة عن هندوس ومرة يهتمون بالورد وكل أشيائهم التجميلية يدخل فيها الورد ، رحنا كذا محل جميل ولقيت فيه آدمية تسوي أشياء بيدها ، وشفت هذا الماسك عندها ، وسألتها عنه قالت حلو وسكتت وأنا قلبي كذا متحمس ، وأطالع فيها لو سمحتي حمسيني إني أشتريه ، ماعطتني وجه  ، فقلت أخذه ومالو خلينا نجرب ، وأخذته وأنا متحمسة هههههه مايحتاج تحمسني ، اش أقولكم يابنات لما سويت مساج عندهم كل شيء استخدموه لي بالورد ، بس كنت أتمنى يغطسوني بورد كذا وأنااااام ياسلام شيء منعش وأنثوي وأحب الورد كثير كثير أوكي باسكت وأحط نقطة .

{ مزيل للرؤوس السوداء من Acnes أخذته بـ خمس ريال }

هذا أخذته من الصيدلية اللي تكلمت عنها فوق ، عندي أزمة مع الرؤوس السوداء أكرهها كثير فقلت أخذه ونجرب كيف فعاليته .

{ فواحات عطرية من جزيرة بالي بـ 30 ريال }

أخذتها من عند نفس الآدمية ، فواحات تقولي كل وحدة بريحة عطر وردة مختلفة ، تحمست وأخذت لي علبة ونجربها ونشوف كيف .

{ أوميغا ثري من Wellness سعرها 250 ريال }

أخذتها أيضاً من الصيدلية اللي بسوق بلازا ، طبعاً كان عليها تخفيض كانت بـ 300 ريال ، وأخذتها بـ 250 ريال ، ايش اللي خلاني أخذها ، إنو أنا من يوم عمري 16 سنة وأنا استخدم الأوميقا ثري ما أقدر أسيبه لو سبته شعري يطيح ، أظافيري تتكسر ، وأصير بس خملانه ، وتعبانه وكسلانه ومتنحة وكل شيء ، ولو إني عايشة بالساحل والمفروض أستغني عن أي أوميغا بالعالم لأن المفروض أكل سمك كثير ، بس ماناكله إلا مرة بالأسبوع وما أحب التونة أبداً *اللهم لك الحمد* ما أحب التونة وأعشق السمك والجمبري كيف تجي ؟ مدري كذا نفسي خايسة في الأكل من يومها  *الله يعين زوجي المستقبلي * *فيس مستحي* ههههههه، فا أخذت العلبة لأنها تكفيني لخمس شهور فيها 150 كبسولة ، فشيء جميل وخلاص كذا أفتك كل شهر ناطة الصيدلية .

آخر شيء هو نقول يعني آلة تستخدم لتنظيف اللسان مرة نفسي فيها من أول بس ماحصل الشرف إني أشتريها إلا ألحين سعرها ريالين فقط .

وبس كذا خلصنا الجزء الأول من المشتريات اللي اشتريتها من رحلتنا في إندونيسيا ، بإذن الله راح أكمل حبه حبه ، لأني محاضراتي بالجامعة بدأت وأحتاج أركز كثير عليها ، فأبغى أوفق بين المدونة واليوتيوب والدراسة ، أحبكم  كثير ، أي استفسار أي شيء أي طلب آمروني وتدللوا 

بوسات وحضن ♥ XO