ج1: بداية التغيير وونوينا النية لزيادة الوزن بشكل صحي ♥

أهلين بنات 

كيفكم ♥

تدوينة اليوم راح أتكلم فيها عن شيء مره ودي فيه من زمان وأبغى أحققه قريب إن شاء الله ♥

وهو زيادة وزني للمعدل الطبيعي والصحي المناسب لجسمي !

أول مانولدت أنولدت بجسم طبيعي جداً و ع كلام أمي تقول كنتي منفوخه ومربربه وكل شيء فيك طبيعي وجميل لين دخلتي أولى ابتدائي يعني لسن سبعة سنين وقلبتي وتغيرتي وشهيتك للأكل صايرة عدم وبالغصب وبالضرب تاكلين وتتقرفين من كل شيء وتشمين روائح غريبة في الأكل وتذوقين كمان أشياء غريبة هههههه والله حالتي حالة المهم تقول من يومتها بدأ جسمك يضعف وكل ماكبرتي يضعف أكثر وأكثر لين وصلتي سن تقريباً 14 سنة وهي كان مرحلة المتوسطة ، أول مابلغت جاء في راسي إن غالباً البنت أول ماتبلغ يتغير جسمها للأحلى وتبرز لها أشياء بجسمها وتسمن وشهيتها تتغير وكل الكلام المعروف ، وبهذا المرحلة جلست أنتظر هذا الشيء يحصل وللأسف ماتغير فيني شيء وظليت نفس ما أنا وزيادة للأسوأ ، وقتها صار كلام الناس كثير يأثر فيني لأن كنت بمرحلة مراهقة وهذه المرحلة من أخطر المراحل بحياة الإنسان يعني ممكن وقتها يسوي أشياء غلط ممكن بس عشان يتفادى أشياء تضايقه بحياته من الناس وكلامهم ونظراتهم وهذه المرحلة بالذات البنت تكون حساسة أكثر من اللازم من كل شيء بحياتها !! ، فكنت أستخدم أشياء من ورى أهلي بس عشان ما أبغى صحباتي بالمدرسة يضايقوني بالكلام عشان جسمي اللي كان مره نحيف وتحت المعدل الطبيعي لجسم البنت في هذا السن ، أفتكر وقتها أستخدمت حاجه اسمها العنبرية صراحة مدري من إيش مصنوعة ولكن كان طعمها لذيذ ولا سوت فيني شيء ولا تغير فيني شيء لأن ماكنت ومازلت على حالة إني ما أكل أصلاً !! بعدها وصلت لمرحلة الثانوية ودخلت على عالم مختلف تماماً عن عالم المتوسطة ومشاعري وقتها كانت أكثر حساسية لأن كان في كثير بنات يضايقوني بالكلام والتعليقات والألقاب السخيفة وكنت ألاحظ وأقارن وهذا شيء مره غلط جسمي بأجسامهم يعني كنت من بينهم زي الكتكوته وماشاء الله كانوا جنبي عمالقة أجسام وطول هههههه فهذا الشيء أثر فيني وخلاني للمرة الثانية أخذ وأستخدم شيء من ورا أهلي عشان مايخاصموني وهي كانت حبوب البرياكتين فاتحة للشهية أخذتها أول سنة من الثانوي تقريباً لمدة 6 شهور ، مع الاستخدام المستمر الحمدلله وزني تعدل شوي وأفتكر وقتها زدت 6 كيلو وتغيرت شوي وحسيت بثقة بنفسي أكثر ، بعدها بفترة حسبت إن خلاص جسمي بيجلس كذا ع طول وتركت الحبوب ورجعت حليمة لعادتها القديمة ، رجعت نقصت وزني ولكن مو كثير بس رجعت نحفت ومن بعدها مازدت أبداً لين تخرجت من الثانوية ، لما تخرجت من الثانوية وكنت أداوم أول سنة بالجامعة كانوا صحباتي الجدد اللي تعرفت ينصحوني استخدم أيضاً حبوب لفتح الشهية اسمها سابروفيتا وقالوا لي إنها ماتنوجد بالسعودية ولازم أطلبها من مندوبة وبالفعل دورت لين لقيت وحدة وجابتها لي ، أخذت لي 4 علب أو 6 ناسبة والله ، واستخدمتها شهر واحد بس وزدت خمس كيلو لين وصلت 39 كيلو جرام ، طبعاً مو بس كانت صدمة لي كان شيء يونس كثير فرحت وانبسطت وكل مشاعير الحياة الحلوة ، كانت نيتي إني أكمل كل العلب ولكن ماخلصت بشهر غير علبتين والسبب كان إنها أثرت فيني كثير بعقلي ونومي أنا صراحة ماكنت أعرف ليش ماتنوجد بالسعودية ولكن أكيد لسبب ما ! فوقتها إذا متخيلين أجلس يوم كامل نايمه !! ماعندي مشكلة يعني بس أقوم أكل وأرجع أنام أي شيء غير هذا الشيء ماقدر أسويه أفتكر مره رحنا لجدتي وكان عندها ضيوف وقسم بالله بنات ماحسيت بنفسي إلا نايمة بينهم هههههههههه مره موقف محرج ولكن أقولكم قد إيش كان مفعولها بالتخدير وغالباً كل حبوب فاتحة للشهية تملك نفس الشيء من هذه الناحية ، فغير إنها كانت تنيمني بشكل غير معقول كان يجيني صداع مو طبيعي بجد بنات مو طبيعي ومعصبه وجيعانه وأبغى أتضارب مع كل الناس فهذا كان تأثيرها علي بشهر من الناحية السلبية بس طبعاً سلبيتها تفوقت على إيجابيتها وتركتها ورميت العلب الباقية ، وزني الحمدلله مانزل كثير من بعد ماتركتها يعني غالباً في ناس ترجع تنزل زي أول أو أكثر بس الحمدلله ماصار فيني كذا لكن نزلت كيلوا واحد وصرت 38 كيلوا جرام ، من بعدها صرت حساسة كثير من ناحية جسمي وخلاص صار جل اهتمامي كيف أسمن وأغير جسمي ، يعني يجيوني بنات يقولوا لا تغيريه خليك زي مانتي والله بعد الحمل يتغير ومدري كيف ويجوني بنات يقولوا انسي موضوع جسمك ماراح تتغيري واللي تجي تتشمت ليش نحيفة واه ولا يدك مره صغيرة كأنها يد بيبي ولا وجهك مره صغير كأنك طفلة ومن هالكلام المحبط صراحة !

بعد أول سنة من الجامعة توظفت وتعرفت على وحده الله يسعدها وين ماراحت وهي صديقتي الجميلة والحبوبة واللي أحبها ومن أكثر الناس اللي أرتاح لهم كانت معاي بوظيفتي يعني كانت زميلة بالعمل ، وألحين هي من أقرب الناس لي ، فتحت عيوني على أشياء وغيرت مفاهيم بحياتي وصدق والله ماقالوا : الصاحب ساحب ، سحبتني لعالمها و أثرت فيني كثير ، علمتني كيف أحب الأكل بدون فاتح شهية ولا حبوب ولا أي خرابيط ، علمتني كيف إن يارنا لما تاكلين ويبقى أكل احترمي النعمة وكمليه ولا من الأصل ليش هذه الكمية تسويها كلها ! علمتني إن يارنا لازم تسوي رياضة حتى لو جسمك نحيف ، علمتني كل يوم بالدوام أجيب فطور متكامل وصحي معاي ، علمتني أشياء كثيرة غيرت مفهومي تماماً عن الأكل يعني لو أقولكم قد إيش كنت أكرهه شيء اسمه أكل الله يكرم نعمة ربي ، كنت ما أبغى أشم ريحة أكل أتقرف من أكلات كثيرة وماحب أخلط أكلات مع بعض وما أكل إلا أشياء معينة وأخاف أجرب أكلات وكان عندي عقدة قوية مع الأكل ، أما الرياضة كنت زي أغلب الناس ألحين مقتنعة بإنها تنحف وإن المفروض ما أتحرك وأقعد جالسة عشان أسمن ، فكذا كان تفكيري وهي غيرتني تماماً من بعد فضل الله علي ، الحمدلله خلال سنتين من معاشرتي لها وممارسة التمارين والأكل الصحي زدت 2 كيلوا وثبتت على 40 هههههه ، طبعاً أنا ماكنت زيها إنسانة ملتزمة كنت شهر ألتزم وعشرة لا هههههه بس الأهم من كل هذا إني تأثرت فيها وأثرت فيني وتفكيري تغير100% ♥ !

ألحين مضى على هذا الكلام سنتين من وقت ماتركت الوظيفة ولحد ألحين ماتغيرت فقط لما أشتركت بالنادي قبل فترة أتوقع قبل سنة لو مو غلطانة زدت بشهر كيلو واحد ورجعت نزلته لأني ماهتميت وماواصلت الأكل الصحي ولا الرياضة !

ألحين عمري 24 سنة ولكن اللي يشوفني يقول أكيد 14 سنة ههههه والسبب هو جسمي الصغنطوط ، بس الحمدلله ولو إن جسمي نحيف وصغير إلا أنني أملك صحة الحمدلله يعني حتى معدل الدهون بجسمي ممتاز جداً بس اللحم ضعيف طبعاً فيعني إيش أقولكم ماشاء الله تبارك الله آخر مرة قبل ستة شهور سويت تحاليل عشان توصف لي الدكتورة فيتامينات ، كل شيء بجسمي مية مية لدرجة الدكتورة والله العظيم مصدومة فيني تقول معدل الدم في جسمك أكثر من المطلوب ومن كثر صدمتها قالت أوقفي لي وفسخي عبايتك فسخت لها عبايتي بسم الله علي قالت حرام عليك جسمك يجنن لاتسمنين خليك زي كذا روحي أمريكا وروحي شواطئهم كلهم نفس جسمك ولا تبغين زي هذا اللحم وتطلع لي فخذها ههههههههه يازينها !! المهم طبعاً كلامها أيضاً ماغير فكرتي وحلمي بأني أسمن وأتغير يعني معليش أنا بالسعودية يادكتورة ماني بشواطيء كاليفورنيا *فيس ماد لسانه* هههههه لا أمزح أمزح ، بس لا بجد أبغى أتغير أبغى وزني يصير مثالي وأبغى الملابس تصير على مقاسي ، أبغى مقاس رجلي يتغير شوي وأصير أقلها ألبس 37 ياخي هههههه ! وأبغى أصير أقدر أشيل صحن بدون ماحسه ثقيل ، وبالذات البزران ذحين أتفشل لو جيت أتحبب على نونو ويكون ثقيل والله أطيح أنا وإياه إذا جيت أشيله وكذا عاد أنحرج ههههههه والأهم أصير أكثر ثقة من ناحية هذه النقطة :) .

اللي حصل وبيحصل إني صممت 100 % لو مو بالطيب بالغصب يعني ناويتها نيه أكيده ماتخلص سنة 2014 إلا وأقلها وصلت للوزن الطبيعي المناسب لطولي وإن شاء الله يصير بشكل صحي ما أبغى أسمن دهون أبغى أسمن لحم وأبغى جسم وتقاسيم وشدة وحركات وعلوم زينه و..الخ .

من هنا لكل بنت تعاني نفس ما أعاني أنا هنا معاك وأحس فيك وأعرف بمعاناتك وراح أمسك بيدك معاي إن شاء الله ، أنا عشان أتحمس معاكم وأغصب نفسي بالإلتزام سويت لي حساب بالانستقرام خاص بهذا الشيء فقط 

راح تلاقوني هناك باسم : ragainweight@

كل بنت حابة تشارك تشوف هذا الموضوع لوحدة أيضاً كانت زينا سابقاً وكانت تعاني وصارت إنسانة بيرفكت بحياتها وجسمها وتفكيرها ماشاء الله تلاقوها بتويتر وعندها كمان مدونة : - #سمنة_صحية - ♥

سووا حسابات بالانستقرام ولا تويتر وخلونا نحمس بعض ونشارك بعض تجاربنا وكلنا نوقف مع بعض :) ♥ .

بإذن الله أخلص اختباراتي النهائية خلال شهر وأرجع أسوي لكم سلسلة خاصة بهذا الشيء وتجربتي كاملة إن شاء الله تعالى !

في كثير ناس ماتحب تذكر زي التفاصيل اللي فوق ذكرتها لكم لأسباب كثير منها :

إن أحب أوريكم إني بيرفكت وماعندي أي عيوب !

وزي مايقولوا لما تقولي لأحد نقطة ضعفك يستخدمها ضدك لو كان مثلاً كارهك ولا عدو لك !

ولكن الكمال لله وحده وكل إنسان إلا مايعاني من شيء مو لازم يكون شكله لو حتى شخصيته ولا روحه ولا أي شيء فكثير حلو لو تكلم عن هذا الشيء وهو مرتاح بأن في ناس راح توقف معاه وتدعمه وتشجعه وماتنتقص هذه النقطة ضده ع قولتهم يمسكه باليد اللي توجعه ! الله يكفينا ويكفيكم شرهم !

شكراً كثير لكل وحدة قرأت التدوينة كاملة وأخذت من وقتها وسمعتني ♥

وأتمنى منكم إنو تتمنوا لي الحظ هههه وتدعون لي كثير ♥

واللي حابة تشاركني خلينا نقول تحدي أو تحقيق الهدف راح أكون كثير مبسوطة ♥

 

♥