عرض وتقييم لـ : فندق بولمان زمزم في مكة .

عرض وتقييم لـ : فندق بولمان زمزم في مكة

إن شاء الله راح أقولكم كيف كانت رحلتنا لمكة بشكل عام زائد عرض وتقييمي للفندق اللي سكنا فيه ، في وحدة من الأسابيع قرروا أهلي ننزل أو نطلع لمكة وناخذ عمرة وننبسط فقالوا لي رنا دوري لنا حجز بفندق يكون قدام الحرم بالضبط ، أمي تبغى يكون فيه مطل للحرم وأبوي قالي أهم شيء يكون في إفطار مجاني ومواقف للسيارات ، وأنا وأخواتي أو بالأصح أنا بالذات مهم يكون فيه عدد كراسي للنوم تكفينا عشان لو مانمت كويس ممكن أعصب وأزعل :) .

جلست بالبوكينج هذاك اليوم وبحثت بحثت لين حصلت شيء يناسبنا من كل الجهات ويناسب الميزانية ع أساس كنا بنجلس 3 أيام بس عشان شغل أمي وأبوي ومش عارفة قلصوها لليلة وحدة فقط .

رابط الفندق - فندق بولمان زمزم مكة - خمس نجوم 

بما إني حجزت قبلها بأسبوع فالسعر لـ ليلة كان شوي مرتفع ، أخذت ' جناح تنفيذي مطل على الكعبة (5 أشخاص بالغين) ' ليلة واحدة بسعر 1400 ريال .

توكلنا على الله وأحرمنا من البيت بما إن احنا بجدة وميقاتنا هنا ، مشينا الساعة 3 ع أساس تسجيل الدخول بيكون الساعة 5 العصر ، مشينا ووصلنا بعد ساعة لمكة وجلسنا تقريبا 45 دقيقة بعدها نحوس عشان ندور وين مواقف الفندق كل ماسألنا أحد يضيعنا ويودينا لمكان غير معروف ومجهول الهوية وأمي طول الوقت هذاك وهي تردد " أهل مكة أدرى بشوارعها " للأسف ماكان حقيقي وقتها هههههه ، بعد جهد جهيد الحمدلله حصلنا المواقف وكانت إذا أحد بيحجز أتوقع تنزلوا من تحت كبري حاجة زي كذا وتلاقوها تحت مع مواقف أبراج البيت كلها تحت ، المهم وصلنا الحمدلله وقفنا سيارتنا وجاء الآدمي ياخذ المفتاح والسيارة وهو راح يوديها للمواقف مابيتعب أبوي الحمدلله هههه ، جاء اللي ياخذ الشنط اسمه " سعيد " وأخذ شنطنا وطلعنا من انصاصير وبعد الاصنصير طلعنا من اصنصير ثاني وكل واحد ماسك يده ع قلبه ههههه دوخة بحق وحقيقي ، بعد كذا وصلنا للاستقبال الحمدلله .

أول مادخلنا كان في تفتيش شنط ومش عارفة ايه ، وبعدها دخلنا جوا الاستقبال وكانت ديكوراته فضيعه وتجنن كذا اسلامية مودرن مدري كيف جميلة مرة ، جلسنا لين أبوي خلص اجرائات التشيك ان ، وبعدها طلعنا مع نفس حق الشنط أخذنا باصنصير ثاني << دموع حزينة مع يد ماسك قلبه وراسه وكل شيء بجسمه هههههه .

دخلنا الحمدلله جناحنا ونسيت أذكرلكم إن من شروط أبوي ما أحجز غرف متفرقة ع أساس هي بتكفينا فقال نبغى مع بعض بدون تفرقة ، فالجناح زي ماكان مكتوب يكفي لخمس أشخاص واحنا كنا 7 أشخاص بسلامة أختي رغد هي دايماً مانحسبها حجمها زي الاصبع فيكفيها أي مكان ههههه ، عموماً راح أوريكم أول ماتدخلوا الجناح :

أول ماتدخلي المطبخ ع يمينك وفي حمام ع يسارك وقدامك الصالة وصالة الطعام مع بعض ، ككل كانت جميلة ومساحتها حلوة تكفينا ، في كنبتين مفردة وكنبة ثنائية فيها سرير لشخصين تقدري تفتحيه ، وفيها دولاب فيه مخدتين وبطانيتين ، في تلفزيون وفي تليفون وطبعاً شباك كبير يطل ع الكعبة والحرم بس احنا كنا متصورين إن المطل بيكون بشكل مباشر بس زي منتم شايفين بأول صورة كأننا جايين من جنب مو مطل ع الحرم أو الكعبة بشكل كامل .

المطبخ كان مره جميل فيه ثلاجة وفرن وغلاية وأكواب ومساحته جميلة وتكفي لو أحد يبغى يجلس لفترة طويلة ، بس للأسف مافيه قهوة سكر حليب زي كل الفنادق اللي نروح لها ، والثلاجة فاضية تماماً يعني اللي بيجي يقضي شوية عصيرات وسناكات عشان لو جاع فجاءة بالليل ماراح يلاقي أي شيء مأمن بالثلاجة، أما الحمام الله يكرمكم كان نظيف جداً وجميل أيضاً ومتوفر فيه أغلب الأشياء عادا الشيء الوحييييد اللي ماجبناه من جدة وكنا معتمدين ع الفندق وهو فرش الأسنان والمعاجين ، يعني المفروض كانوا موفرينه بس للأسف ماحصلنا شيء .

بعد المطبخ ع اليمين ع طول غرفة الأم والأب ع قولة رغودي ههههه ، السرر كانت نظيفة وتجنن مرتبتها ومخداتها مريحة مرررة ، كان فيها طاولة صغيرونة زي الاستادي ديسك ، وبداخل الغرفة حمام صراحة ماخشيته ولا شفته بس أتذكر أبوي قال ليش مافي فرش ومعاجين فاتوقع نفس الشيء كان ناقصه كذا .

آخر شيء كانت غرفة يعني للأبناء مثلاً وكان فيها سريرين مرة وسيعين ماشاء الله يعني يكفون 3 أشخاص نحيفين ههههه ، وكان فيه مطل ع الحرم والكعبة أيضاً ، وفيه تلفزيون وطاولة كبيرة بس مافيه حمام ، الفرش والمراتب نظيفة ومريحة مرة والمخدات وكل شيء شيء كان مره بيرفكت .

توضينا وكان خلاص قرب أذان المغرب ونزلنا عشان ناخذ العمرة واحنا مقسمين 3 ينزلوا ياخذوا عمرة أول ويخلصوا ويرجعوا وبعدين 3 ينزلوا عشان رغد مانبغى ننزلها معانا ونخاف تضيع ولا شيء فتقسمنا زي كذا ، أول شيء نزلت أنا ورنيم وأبوي صلينا المغرب وبدأنا العمرة كان في البداية في زحمة فضيعة بعدين مدري خفوا فجاءة بس أتوقع عشان وقت الصلاة ، بس الحمدلله ربي سهلها علينا وأخذنا العمرة بساعتين وخلصنا ورجعنا الفندق ونزلوا أمي وروان ورهف وكملوا وأيضاً أخذت منهم ساعتين ورجعوا الحمدلله ، طبعاً وقت ماكنت نعتمر أمي تقول طلبت من المطعم وزي ماهم كاتبين مفتوح 24 ساعة ، المطعم التابع للفندق تقول دقيت عليهم عشر مرات وكل شوي يصرفوني بعذر لين آخر شيء طفشوا مني وقالوا اطلبي وطلبت ساندويتش لرغد وميرندا أتوقع كلفها خمسين ريال وجاها بارد مرة ومو طعم :( ، فا نرجع لموضوعنا بعد ماخلصنا كلنا العمرة ريحنا شوي ووقتها كانت الساعة 11 قال أبوي يالله ننزل للمطاعم التجارية مو مطعم الفندق نفسه ، وجلسنا ندور ندور وكانت مطاعم من أشكال وألوان بس أغلبها صراحة مايهيأ تاكلي منها ، ماعادا المطاعم اللي زي برجر كينج وبيتزا هوت ، المهم توزعوا أهلي وكل شخص راح يطلب ع ذوقه وأنا وأمي كنا نمشي مع بعض وصادفنا هذا المطعم *فيس قلوب وشوق وحب وكل شيء بالدنيا غرام * .

مطعم جاوي أو اندونيسي *يمي يمي* أول شيء الصورتين هذه للمطعم كانت بالظهر اليوم الثاني وكان وقت بوفية وماكان مره جميل وشهي زي اللي بالليل ، عموماً وقفنا كذا والريحة تشدني وتشد أمي لين خلاص بغينا نصيح وطلبنا صحنين رز أبيض وبيض بالكاري ومقلقل وبطاطس مقلي بالصلصة وسمك شيء مو صاحي طعمه ، ونجتمع ع طاولة كلنا وناكل بشكل هستيري أنا وأمي واو شيء لذيذ ومرررة يعني مدري خانني التعبير بس شيء فنان ، وماكلفنا الصحن الكبير هذا غير 30 ريال ، مرة أنصحكم تجربونها بنات .

رجعنا الفندق وتوزعت العائلة بكل سرير وأنا اللي كنت شايلة هم النومه ههههه ، اخترت السرير اللي بالكنب في الصالة والله لايوريكم ، كان شيء مقرف مقرف ، مبقع وفيه ريحة غريبة بغيت استفرغ رجعت لفيت الكنبتين المفردة ونمت عليها مع المخدات والبطاطين حواليني وتحتي وبكل مكان هههههه وراسي معووج بس يلا كانت ليلة وحده ومشي الحال هههههه ، بعد كذا حول الساعة 4 ناسية والله أذن الفجر وكان بداخل الفجر منبهات أذان صوتها عالي مرررة اللي نومه ثقيل بيصحى منها وصحينا نزلنا صلينا الفجر وتمشينا بالحرم وحوالين الحرم ولفينا حول أبراج البيت كلها ورحنا للفطور طبعاً كان مجاني شامل لكل أفراد العائلة من نفس مطعم الفندق وكان لذيييييذ بحق وحقيقي شيء مره شهي من كل مالذ وطاب ماشاء الله بتحصلي فطور عربي وفطور أمريكي وكل شيء لذيذ بالحياة .

طلعنا قرب الساعة 11 عشان نسوي تشك أوت تسجيل خروج وتفاجئنا بالآدمي يقولنا خذوا راحتكم لين الساعة 4 العصر ، مررره بغينا نطير من الفرح يعني سووا لنا تمديد لأن كان مكتوب تسجيل الخروج الساعة 12 بالبوكينج ، المهم طلعنا الغرف ريحنا شوي ونزلنا المطاعم التجارية مرة ثانية ندور غداء وللأسف المطعم اللي بغيته الجاوي كان بوفيه والأكل اللي فيه مو شهي كثير فرجعت أخذت لي بيتزا من بيتزا هوت ورجعنا الفندق أخذنا أغراضنا ونزلنا نطلب سيارتنا والحمدلله كانت رحلة ممتعة وموفقة .

التقييم بشكل عام للفندق :

الموقع مباشرة قدام الحرم وهو يعتبر من أبراج البيت اللي موجودة ، طلبنا مطل للكعبة وكانت فعلاً مطله بس مو بالشكل اللي تخيلناه بأن الصورة للحرم بنشوفها كاملة مو جزء يميني فقط .

كثرة الاصنصيرات للي زينا يدوخون بسهولة ههههه شيء مره متعب .

الجناح مره روعة وكفانا 7 أشخاص بدون مزاحمة يمكن عشان أحجامنا بتيت .

نقص الأغراض شيء بطال شوي يعني الحمدلله كان في سوبر ماركت تحت ولا مدري ايش بنسوي ماخذنا ولا احتياط ومعتمدين ع الفندق من ناحية العصيرات مويات سناكات فرش ومعاجين .

التكييف كان ثلج وبلغناهم كذا مرة ويجيبوا عامل ويخفضه بس ماحسينا بأي فرق وكان مره ثلج وبرررررد .

الافطار كان لذيذ جداً بعكس لما أمي طلبت ساندويتشه لرغد كانت الحمدلله يارب باردة ومافيها طعم وغالية .

السرير اللي فتحته من الكنبة كان سيء للغاية موسخ وفيه ريحة كريهه عكس فرش السرر الباقية كانت نظيفة جداً ومريحة .

تسجيل الدخول والخروج كان سريع الحمدلله .

حامل الشنط كان اسمه " سعيد " مره كان لطيف ويهتم فينا كثير كثير .

تحت الفندق بتحصلي أسواق ومطاعم وكل شيء تبغينه تقريباً حتى الصيدلية والسوبرماركت .

أي استفساارات ثانية ولو عجبكم الموضوع في حال حصلت لنا رحلة ثانية وناوينها إن شاء الله للمدينة وحابين أسوي لكم نفس الشيء اكتبوا لي وتامرون آمر .

❤