مشترياتي من لشّ

Curly Wurly 

شامبو بجوز الهند 

أخذته ع أساس زي ماهو مكتوب بالموقع إنه يناسب الشعر المموج وينعمه وينظفه ويتكته << آخر كلمة من عندي ، ريحته لطيفة وحلوة ماهي مزعجة أو مثلاً غير مقبولة لا بالعكس حلوة كثير .

Daddy O

شامبو بقاعدة بنفسجية 

أخذته لأمي صراحة وماجربته ولا شميته حتى ، بس قلت أوريكم عشان لو ممكن أحد يبغى يستفيد ، هو عبارة عن شامبو بلون بنفسجي أو قاعدة بنفسجية يناسب اللي صابغين شعورهم أشقر أو رمادي أو أبيض ، يحافظ على لون الصبغة من إنه يتغير ويحمر أو يصير أورنجي ، طبعاً أمي صبغت قبل ماشتري لها وبعد ترويشتين قالت لي رنا أحس صبغتي تغير لونها ! قلت لها خلاص أنا باشتري لك شامبو كذا كذا عشان تحافظين على اللون ، وإن شاء الله بعد فترة أقولكم كيف كان معاها .

Veganese 

بلسم اللافندر والليمون

أيضاً أخذته لأمي مع الشامبو ، وقد جربت هذا البلسم من قبل حلو بس مره خفيف وحسيته يناسب الشعر الدهني ، وشعر أمي مره دهني فأخذته لها لأن قلت أكيد راح يناسبها ، وإن شاء الله بعد فترة كمان راح أسألها كيف كان معاها هو والشامبو .

American Cream

بلسم يومي بالكريمة والفراولة

ريحته سويت وحلوة كثير ، الحمدلله يعني الشامبو والبلسم اللي نويت عليهم ماطلعت ريحتهم يعني ريحة ماتُستحمل أو ثقيلة ، مره حلوة ومقبولة ، أتذكر أيام ماكنت أروح النادي كان في وحده شعرها مره يجنن يلمع وصحي ودايماً لما تعرق يطلع من شعرها ريحة حلوة ، فبالصدفة جلست تحكي صديقاتها وأنا أسمعها تقول كل يوم لازم تغسل شعرها ببلسم ( مالقطت الاسم واستحيت اسألها ) وماتغسله بشامبو إلا من مره لمرتين بالأسبوع ، حبيت فكرتها وقلت راح أجربها مع هذا البلسم لأنه مو هذاك البلسم الثقيل اللي لو غسلتي شعرك بموية وحطيتيه كأنك مزيته ولا حاطة كريم مدهن ويطيح كذا يصير خامل مافيه حياة لا حلو مره لا هو خفيف ولا هو ثقيل .

Ro's Argan Body Conditioner 

بلسم خاص بالجسم بزيت الآرقان

كنت حاطته من ضمن الخيارات اللي أول أشمه لو ماعجبتني الريحة نبطل منه ، ماتوقعت أبداً ريحته كذا ، تيـ جـ ن ن ن ن ، ماشاء الله بجد ريحته فضيعة فضيعة ، حبيتها من قلب ، وطبعاً بديت شغل البخل لما يعجبني شيء مره أخاف يخلص ههههه ، وأصير استخدم نقطه نقطه منه ، طريقته بعد الاستحمام وبعد ماغسل جسمي وأنظفه ، أوزع عليه البلسم وهو شوي غرقان ، وبعدها كأني بادهن جسمي ، شويتين كذا يعني ممكن دقيقة أو دقيقتين وأشطف جسمي بالموية ، واللي تبيع تقولي بإمكانك تستخدميه بدون حتى ماتغسلي جسمك بس لسه ماجربت ذي الطريقة .

T'eo

مزيل للتعرق أو رائحة العرق

أخذته ع أساس هذه الفترة مره مو صايرة أهتم بنوعية أكلي ، فألاحظ بعض الأحيان الأكل اللي أكله تطلع ريحته من جسمي لما أعرق ، زي لما أكل هندي بعض الأحيان أشم ريحة البهارات من جسمي ، وولما أحط بذور الحلبة على السلطات تطلع مني ريحة حلبه خفيفه ماتنشم من غيري بس أنا أشمها ههههه ، فأخذتها ع هذا الأساس أول تجربتين منه حرقني مره بس معرف يمكن أنا ماعرفت استخدم الطريقة الصحيحة عموماً أحتاج أجربه أكثر وأقولكم .

Grease Lightning

جل تفتيح لآثار الحبوب

هذا الجل شفت كثير يوتيوبرز وبلوجرز يستخدمونه بس مانتبهت لهم هل فادهم أو لا ، طبعاً ممكن معضمكم يعرف إني أعاني من فترة حبوب وآثار فأخذته ع هذا الأساس وإن شاء الله يفيد معاي .

حابه أذكر نقطتين بس قبل تمشوا وتقفلوا التدوينة :

أول نصيحة أنصحكم هي إنو تسيروا على الموقع قبل تروحوا تشتروا من لاش ليش؟

لأن لما تروحي تحسي نفسك مخبصة وتحتاري وتلخبطي بين ذا وذا ، وغير عن كذا البنات اللي يشتغلوا بلَّش بصراحة مو زي أول مافتح المحل ذحين أسألها وتقولي وأنا أصحح لها المعلومات ، مو عن شيء يعني إنو أنا واو وأعرف أحسن منهم ومدري شنو ، يعني حتى أنا لسه توني ببداية الحياة التدوينية التجميلية الخبيرية توني سنة أولى ، بس كمحل أسمع إنهم يسووا دورات ومايخلوا الوحده تمسك المحل إلا وخلاص فاهمة كل شيء ! لأن حرام تجي وحده تبغى تشتري ضايعة وماعندها خبره وتخبص العامله اللي تبيع معاها ويجيبون العيد حرام هذه أمانة عمل ، فعشان أفضل شيء تقرأو يابنات اقرأوا اقرأوا ، افتحوا الموقع خذوا ورقة وقلم واقرأي قسم قسم حسب احتياجاتك اش تبغي واكتبيه وروحي هناك شميه عجبتك الريحة كان بها ماعجبتك روحي لخيار ثاني وهكذا، إنتي لو ماقرأتي بتخبصي مع اللي تبيع واللي تبيع بتكون بدوامة تشرح لك البرودكت غلط ولاّ تسوق لك المنتج ، وأكيد أكيد ماينطبق على كل البنات اللي بيشتغلوا ماعرف ماجربتهم كلهم بس الواحد لازم ينتبه ويصحصح قبل يدفع فلوسه من تعبه وعرقه ع شيء يستحق !!

النقطة الثانية هي أنا أكتب لكم عنوان " مشترياتي " يعني لسه توني مشتريتها وماجربتها كثير فلما أكتبها وأمدحها كبداية مو معناها حلوة روحوا اشتروها لا لما أكتب ريفيو أو عرض أو تجربتي هنا راح تختلف النظرية وتكون التدوينة يا أنصحك يا ما أنصحك تجربيه ، زي كذا !

وسلامتكم إن شاء الله انبسطتوا ، وقولوا لي اش جربتم من اللي عرضته ؟ 

وأكثر شيء تحبيه بلَش أو لاش أو لُش ؟ اختلفت الأسباب والموت واحدُ هههههه .

موقع لّش بالعربي مع الأسعار عليه - هنا -

اشتريتهم من فرع مجمع العرب/ جدة

وفي فرع بستارز أفينيو/ جدة

هذول فروعهم لحد ذحين بجدة فقط ، لو ماكنتي من جدة ابحثي بقوقل عن فروعهم بمنطقتك .

❤