أنا رجعت │ I'm Back

واو !

 من جد واو آخر تدوينة كانت بنهاية السنة اللي فاتت ، ماكتبت ولا شيئ لهذه السنة ، بكل صراحة ماكنت متوقعة البريك حقي بياخذ كل هذا الوقت ، توقعت يكون أسبوعين لثلاث أسابيع ، ولكن طول بزيادة غصباً عني  .

إيوه تزوجت بس والله ماصبغت شعري أشقر وسحبت ههههههههههه ، لا بس هذه التعليقات اللي كانت في الانستقرام وفطستني ضحك ، ما ألومكم تفكروا كذا بس الشغلة ماكانت مجرد تزوجت واتشغلت بأمور الزواج ، الشغلة بالنسبة لي كانت أكبر من كذا ، خلوني أحكيكم لأني معتبرتكم صديقاتي وانصدمت من ردة فعلكم الجميلة بعد مارجعت لتويتر والانستقرام ، الشغلة ياصديقاتي كانت بإن زوجي من سكان الرياض وأنا من سكان جدة  ، فجاءة قالي زوجي راح يكون المستقر الأكيد حقنا هو الرياض بدل ماكان من المفترض منطقة ثانية أو منطقة جدة ، كان الخبر هذا بعد ملكتي اللي كانت بديسمبر 2014 ، حسيت بلخبطة بكل شيء بحياتي من بداية ما إن خلاص راح أطلع من جدة بعيد عن أهلي وبعيد عن صديقاتي وبعيد عن كل الناس اللي أعرفها ، وأروح للرياض اللي ما أعرف فيها نقطة مخلوق :( ولا حتى أحبها :( ، مشاعري وأفكاري وكل مخططاتي وترتيباتي تلخبطت ، حسيت أني مابقدر أستحمل البُعد عن أهلي ولا راح أقدر أقعد بالرياض أسبوع كامل ، مدري اش فيني اللي يسمعني يقول رايحة تسكن في الفضاء لوحدها هههههههه ، لا والله بس مدري فكرة إن أهلي بيكونوا بعيدين عني وأنا باسكن بمنطقة غير جدة !! فكرة جديدة بالنسبة لي ومتعبة نفسياً ، ذحين تقولوا بقلبكم اش ذي النونو هههههه ، والله مدري يمكن اللي مرت بتجربتي حاسه بالوضع اللي أنا قاعدة أمر فيه ، فطبعاً ماكان بين ملكتي وزواجي غير 6 شهور ، انشغلت وتعمقت في نفسي وحاولت أرتب وضعي وأزبط كل شيء ، حاولت أتحلل وأعيش كل لحظة كانت بيني وبين أهلي ، حاولت أشبع رئتي من هواء جدة الجميل ، وماكنت أبغى أي شيء يشغلني ، طبعاً وقتها المفترض كمان تكون سنة تخرجي ولكن للأسف اعتذرت من الجامعة لأن نفسيتي ماكانت مستحمله أفتح الكتب وأذاكر ، غير تجهيزات الزواج اللي كانت علينا بما إن زوجي وأهله في الرياض والزواج بجدة فكنت أسوي وأجهز كل شيء بنفسي ومافي وقت أنشغل بشيء ثاني ، ستة شهور كانت فترة قياسية عشان أنجز حاجات وأتشبع من حاجات وأرتب حاجات .

تزوجت في شهر جون ، يب قبل رمضان بـ 8 أيام تقريباً ههههههههه ، وصار لي ذحين 3 شهور وعليها تقريباً وأنا في الرياض ، زوجي حبيبي اللي ذحين اعتبره من أول الداعمين والمعجبين لي وهو اللي خلاني وأصر علي أرجع ذحين بهذا الوقت مع إن قلت له خليني لين بداية السنة الجديدة عشان أبدأ بداية حلوة بس قالي جملة جميلة وهي :

if you waiting for everything to be perfect ! you will be waiting for ever !!

الجملة صحصحتني وبالفعل أنا كنت ما أبغى أرجع إلا وأنا مجهزة كل شيء وعندي كل شيء، فقلي ليش تنتظرين عشان كل شيء يكون بيرفكت بيدك ابدأي ولو بداية بسيطة ومع الأيام إن شاء الله الوضع يتعدل وكل شيء يتصلح على مهله  لين خلاص توصلين للمرحلة اللي راضيه عنها وتبغينها ، شكراً زوجي الله يسعدك ويخليك لي يارب .

وطبعاً قبل أمس كان أبوي يكلمني وزعلان مني عشاني موقفة بهذا المجال ، ويحكي لي قصص الناجحين بالحياة حتى لو وقفوا فترة طويلة وحتى لو واجهوا مشاكل فقلي يابنتي عشان خاطري بس كملي ، بابا أحبك شكراً ياعمري إنت ، إنت أول شخص يدعمني بهذا المجال .

فكرت تفكير عميق ، راجعت نفسي وراجعت كل شيء واكتشفت بإن الحمدلله طلعت الشغلة سهلة أو خلوني أقول استسهلتها وبسطتها لنفسي ، الرياض زي جدة بس بدون بحر وأهلي أشوفهم وأكلمهم كل يوم ببرامج اليومين هذه الحمدلله ، فخلاص الوضع مو مختلف اختلاف كبير ، فلازم أكون قوية واستمر بشكل أقوى .

بعد مانزلت صورة في الانستقرام وبعد ماكتبت بتويتر تحية وسلام ، تفاجاءت فيكم بنات ، والله حسبتكم نسيتوني وغير عن كذا أول مرة بحياتي من دخلت المجال حسستوني بإنكم صديقاتي والله العظيم ، ماحسستوني إنكم مجرد متابعات تبغوا تستفيدوا مني والسلام ، لئة حسيت بإحساس عظيم لدرجة أمس جاني حماس بسم الله شوي وأطييررررررر ، شكراً لقلوبكم شكراً لمشاعركم الجياشة شكراً لرقي أخلاقكم وشكراُ لأنكم عذرتوني ورحبتوا فيني بحماس ، والله أحس أعشقكم مو بس أحبكم ، الحمدلله يارب عليكم ، أنا محظوظة فيكم حتى لو كنتوا بس خمسة بنات محظووووظة للسماء ، مبسوطة فيكم ولاتعتبروني مجرد بلوقر ولا يوتيوبر ، لئة اعتبروني صديقة حابين تستفيدوا منها وتستفيد منكم ، لأن بجد أنا ما أعتبر نفسي فاشينستا ولا أعتبر نفسي ميك أب ارتيسيت ولا أعتبر نفسي اخصائية عناية جلدية ههههه ولا حتى شيف في الطبخ ، بنت بسيطة بينكم أتعلم وأعرف أشياء وعندي موهبة بحاجات فأكتبها وأعرضها لكم هنا وباليوتيوب .

طبعاً عندي مفاجاءة يارب يارب ماتخرب وهي لليوتيوب ، راح تنبسطوا فيها كثير وأنا بتريحني وتبسطني زيكم وتقربنا من بعض أكثر إن شاء الله .

شكراً زوجي شكراً أهلي شكراً صديقاتي المتابعات أحبكم كلكم .

آسفة لو في كلجات جالسة أكتب من كيبورد مافيه عربي ههههههه .

انتظروني .. بس هالمرة وعد مو انتظار طويل :)

♡