٤ آشياء حبيتها بوقت واحد ❤

 ٤ آشياء حبيتها بوقت واحد ❤ 

فوجى إنستاكس مينى

Fujifilm Instax Mini 8

كاميرا مش احترافيه ! فوريه تطلع لك الصورة بنفس اللحظة بشكل بسيط جداً ، كان نفسي فيها من زمان بس ماكنت موجهه لها آولوية كبيرة عشان اتجهه لها بسرعه واشتريها ، قبل فترة قصيرة زرت صديقة بالرياض وشفتها معلقة صور كثيرة في بيتها من هذه الصور ، ياربي بس شفتها انهبلت قد ايش طالع المنظر حلو وكيوت ، تحمست كثير لها وقلت لازم اشتريها واشتريتها !! ، تستاهل كل قرش لآنها تطلع لك الصور بشكل عفوي وبسيط وهذا الشيء يحمس يكون بيدك كذكرى ، صغيرة الحجم وماهي خفيفة مره ،لا هي ثقيله مره ولا هي متوسطة تعتبر بين الخفيف إلى المتوسط ، متوفر منها آلوان كثير بس اللون الوردي عجبني آكثر ، اشتريت فيلمين بكل فيلم فيه عشر صور تقريباً ، الصور متوفرة آون لاين يعني بالمواقع بستايلات وبراويز وفريمات وآشكال مره كثيرة وكيوت حقت بيرثداي { عيد ميلاد } حقت زواجات حقت دراسة آشكال كثيرة مره مره ، بس للآسف  المتوفر بالسعودية الشكل الرسمي اللي هو الفريم آو الإيطار الآبيض ، فيها فلاش تقدري تصوري بالنهار وبالليل بس تضبطين الإعدادات عشان تضبط لك الصور ماتطلع لك فاتحة مره ولا غامقة وظلام ، حبيتها وسرت آصور صور كيوت وآعلق بجدران البيت وبكل مكان آشوفه يحقق لي ذكرى جميلة .

سعر الكاميرا مو فاكره كثير بس حول : ٣٠٠ ريال

سعر الفلمين : ٧٠ ريال 

من : جرير

كُحل آسود من ميك آب فو إيفر

MAKE UP FOR EVER Kohl Pencil / Kohl Pencil Black 1K

تتذكروا كيف كنت آشكي لكم من الآكحال وعيني وقد ايش هي حساسة وماتستحمل آي كحل بالحياة ، جاء الوقت آخيراً إني آقولكم الكحل هذا كملت استخدامه سنة كاملة بشكل متقطع ، وكل المرات اللي استخدمتها فيه ولا نقطه ولا ربع نقطة تحسست عيني ، الكحل هذا انخلق للعيون الحساسة شكراً ميك آب فور إيفر الله يسعدكم يارب ، مكوناته فيتامين أي وزيت حبوب المانغو وزيت الجوجوبا ، يعني لا تتحسس عينك ولا يصيبها جفاف ولا هم يحزنون ! اشتريت من هذا الكحل قبل زواجي لونين الآسود هذا ، والبني الجميل جداً درجته كانت { Kohl Pencil Matte Mocha Brown 9K } ، ليلة زواجي وآنا عند الكوافير آخذته معاي لآن ماحبيت تحط لي كحل من عندها لآن آعرف عيني قد ايش بتتحسس وآعرف كيف بيكون شكلي دموع وحمار مع مكياج وتصوير وناس بآهم ليلة بحياتي بيكون شيء سيء فآخذته معاي وسوت لي منه ومع الدوشة وكذا تعرفوا الوحدة كيف تكون بليلة زواجها نسيته عندها ، آع لما آتذكر ذحين آنقهر بس فِدى فِدى لآهم يوم بحياتي ، تحسبون بآرجع آسحب لا مستحيل لازم آشتري منه قريب ، لآن اللون البني يجنن بكل معنى الكلمة آكثر من الآسود ، حبيته على لون بشرتي وستايلي آكثر بس !! النقطة المهمة هنا إن عيني ماتحسست ولا ربع نقطة !! آمبيه حبيت *قلب*

سعر الكحل : 17 $ 

من : موقع سيفورا

لي ستافورد شامبو جاف للشعر الداكن

LEE STAFFORD DRY SHAMPOO - DARK

شفتوا الآيام اللي فجاءة آحد يطب عليك وتطلي بالمرايا شعرك فيه لمعة دهنية بزيادة ع اللزوم ، شفتي لما مافي حيلك تاخذي شاور لشعرك توك متروشة آمس واليوم جذوره واو صايرة تنقط زيت ! ، هنا المنقذ حقي لما يسير لي كل اللي سبق ، آول حاجة آنا صايرة ما آقدر آطول ماآغسل شعري لآكثر من يومين والسبب غير معلوم لازم آزور آخصائية آشوف اش السبب شعري صاير كذا جذوره تدهن بسرعة فضيعة ، يا آكلي ماش يا جسمي تغير يالله آعلم ! عموماً بخه بختين ع الجذور وتنطفي اللمعة ويصير شكلك مرتب آوكي صحيح يبقى الشعر ملبّد ومتلصق حبيتين ببعض خصوصاً بالجذور بس آقلها مظهر اللمعان الدهني الزايد يختفي وع خفيف تحسي التلبّد يفُك، الحلو فيه ايش ؟ الحلو فيه درجة لون المنتج مكتوب دارك يعني غامق ولما آحطه عكس البخاخات اللي جربتها قبل حتى لو كانت غامقة يظل في شعرك شوية غَبَرَه كآنه مغبّر ! ، بس مع هذا المنتج ماشفت ذا الشيء اللون غامق جداً ويندمج مع لون شعرك { شعري لونه غامق لون واحد } ، حبيته وآحب ريحته اللطيفة كآنها عطر منعش .

سعر الشامبو : 80 - 60 ريال

من : صيدلية النهدي

ماسكات ذا فيس شوب

THE FACE SHOP MASK SHEETS

بشكل عام وليس بشكل مخصص للماسك الموجود بالصورة ، آنا تقريباً ختمت كل ماسكات ذا فيس شوب ، يقلع ابليسهم آوف كل مادخلت المحل آطلع وبيدي مليون ماسك ، إش ذا الكياته إيش ذي الماسكات الفضيعة ، يعني نكون صريحين مع بعض غالباً يصيبنا الكسل نسوي ماسكات طبيعية غير إن الوقت مايسمح ويعطي مجال نسوي ونفكر بماسكات طبيعية للآشخاص اللي مشغولين كثير ! فهذه الماسكات فكّت آزمه بشكل فضيع آحبها وكل الآنواع جربتها تقريباً ، ممتعة آشكالها ، تلاقي تنوع لكل آنواع البشرات والاحتياجات ، آنا صايرة حتى لو مو مخصص لبشرتي آخذه وآجربه  آقولكم ختمت الماسكات عندهم سواء للوجه لليد للرجل للآظافير شيء يجنن وفايدته روعه وآسعارهم رخيصه لو حابه تسوي لنفسك اهتمام آكثر كل آسبوع كل آسبوعين ولا كل شهر !

يتراوح سعر الماسك بين : 15 - 60 ريال على ما آظن

من : فتشوا عن فروع المحل بآي سوق قريب منك .

طيب إنتوا إيش آكثر 4 حاجات حابينها حالياً ؟

وهل جربتوا حاجة من اللي حبيتها وذكرتها فوق ؟

❤