دم النباتات الكلوروفيل " اليخضور " + إمشي بثقة وفوحي عطر

♡

آهلين بنات 

زي ماقلت لكم بالفيديو راح أقولكم عن هذه الحبوب العجيبة اسمها " حبوب الكلوروفيل " أو مادة اليخضور 

هذه الحبوب مفعولها يجنن في روائح الجسم ماتخّلي جسمك أبداً يطلع ريحة سواء ريحة عرق أو ريحة فم أو حتى الله يكرمكم لما تتبرزون ينزل بدون ريحة وكمان رائحة دم الدورة الشهرية الله يكرمكم ينزل بدون رائحة سبحان الله ، الحبوب هذه إذا مانفعتكم ماتضركم بس !!

أنا مو مسؤولة عن أي حاجة ممكن تحصل لكم لو لو لو لو تضررتم منها مع إن هذا احتمال بعيددد ان شاءالله 

باعطيكم نبذه عنها سريعة من ويكيبيديا :

مادة اليخضور أو الكلوروفيل مستخرجة من النباتات هي المسؤولة عن عملية البناء الضوئي ، هي اللي تخلي لون النباتات خضراء ، يسمونها العلماء أكسير الحياة أو دم النباتات .

قبل كل شيء لازم تعرفوا يابنات إن هذه الحبوب ماهي علاج لو كانت عندك مشكلة تسبب بأي رائحة بجسمك يعني لنفترض أسنانك مسوسه وخربانه وتأملي منها تعالج لك مشكلة الرائحة مستحيل !! بس لو جسمك نظيف تماماً من الأمراض وكله ولكن مع ذلك تعانين من روائح العرق خصوصاً بوقت الحر وأكل البهارات الكثيرة أو فطريات الأرجل أو رائحة دم الدورة والبراز أو حتى رائحة النفس والفم أول ماتقومي من النوم فهنا بتخفي لك الرائحة تماماً وإذا ماكانت تماماً بتكون بشكل ٧٠٪ .

المادة لها فوائد كثيرة جداً من الناحية الطبية والصحية للجسم ابحثوا عنها بقوقل وراح تنصدموا من فوائدها العجيبة ، باذكر لكم منها حاجتين لاحظتهم بعيوني ، الآلام الدورة الشهرية اختفت و الحبوب الدهنية اللي تطلع لي بين فترة وفترة ببشرتي اختفت .

أنا باتكلم عن فوائدها التجميلية بشكل عام :

بشرتي ماصار تحبب من أي حاجة وقت استخدامي للحبوب فقط لو تركتها ترجع بشرتي زي ماكانت .

رائحة عرق ماتطلع مني لفترة طويلة جداً .

لما ألبس شراب وأجلس فيه وقت طويل ماتعفن رجلي أبداً .

استخدمتها قبل زواجي بشهر و قبل زواجي بيوم صحيت من النوم ورحت لأختي رنيم المسكينة اللي جننتها وقلت لها شميني في ريحة ريق الصباح ؟ قالت لا مافي .

دم الدورة كانت الرائحة خفيفة طبعاً لاتتخيلوا أجلس أشم أشم بذا الشيء ههههههه بس أكيد إنتم عارفين وقت ماتغيري الكوتكس تلاحظي الريحة .

السلبيات اللي واجهتها من الحبوب :

ممكن لاحظتوني أكتب كلمة " دايماً " بس ذي الكلمة ماتنطبق على كل يوم ، بمعنى تمر أيام طويلة أنا ما أشم ريحة بنفسي بس يجي كذا يوم بالشهر أو يومين أشم بنفسي بس ماعرف اش السبب ؟ جلست أبحث عن هذه المشكلة وحسب قرآتي إن المفروض أتجهه للمشروب من المادة هذه بدل الحبوب هي اللي تكون أفضل وآسرع بالتأثير .

السلبية الثانية وهي سببت لي إسهال محرج ، أنا ما أعاني من الإمساك إلا نادراً فلما استخدمها انتبهه إني أكون بالبيت بس بصراحة مدري هل السبب هو إن هذه الحبوب مخلوط معاها ألفا ألفا وهذا اللي أثر علي ! ماني عارفه بصراحة لأني اشتريت منها ٦ علب * فيس خجلان من نفسه * ولحد ذحين ماخلصتها !! أبغى أخلصها وبعدها باستخدم الحبوب أو المشروب بدون إضافة وأشوف هل بيكون نفس النتيجة !! مع العلم إن من تأثيراتها الطبية إنهم معتبرينها ملين ومطهر للقولون يعني لا تتصوروا إن الإسهال مررره فضيع لا عادي بس انتبهوا لما تكونوا بالحمام ماحد حوالينكم يسمع ههههههه ، أنا شرحت لزوجي المشكلة وقالي احتمال إني أنا السبب لأني استخدم حبتين بنفس الوقت وهو يقول خذي حبة وبعد ٨ ساعات مثلاً خذي حبة بس أنا عبيطة وأعرف نفسي أنسى فاخذها حبتين بنفس الوقت .

باختصار لا تهتموا وتنظفوا وتعطروا جسمكم من برا ومن جوا في مشاكل كثيرة تغلب عليها ..

اشربي عصيرات فريش وطبيعية تعطر ريحة جسمك طبيعي اشربي موية ورد بس لاتكثري منها وقت المناسبات فقط، خففوا دهون وأشياء دسمة وبكذا آضمن لكم نقطة عطر بجسمك تمسك فيك مدة طويلة .

حبوب الكلوروفيل اشتريتها من iherb - هنا -

بس أنا اشتريت الحبوب المخلوطة مع ألفا ألفا

بتلاقوا أنواع كثيرة شرابات وحبوب وفي منها مخلوط مع أعشاب أو سادة

شفتها في GNC آرمال سادة بدون أعشاب ثانية

آسعارها حول ٤٠ إلى ٦٠ ريال 

♡

أسماء المنتجات وأماكن الشراء :

phytoneutre clarifying detox shampoo

شامبو منقي الشعر من الترسبات الدهنية

نسيت من أي صيدلية بالضبط بس أفتكر إنها من التحلية بجدة وبسعر حول ٨٠ ريال

شامبو الملح ( بيج BIG ) من لاش LUSH

سعره حول ١١٠ ريال

LEE STAFFORD DRY SHAMPOO - DARK

دراي شامبو من صيدلية النهدي سعره حول ٨٠ - ٦٠ ريال

LEE STAFFORD SERUME

سيروم للشعر من صيدلية النهدي سعره حول ٨٠ - ٩٠ ريال

خمرية الشعر 

وحدة أخذتها من محل مافتكر اسمه بس من سوق المرجان بجدة

والثانيه من عبدالصمد القرشي

البخور 

بخور استبرق من أصغر علي ب١٠٠ ريال

منظفة اللسان

 من أي صيدلية بالعالم

زيت البخور

من محل صابون طرابلسي من الريدسي مول سعره حول ١٢٠ ريال 

البودرات كلها ومزيل العرق البودرة

من أجمل أسعارها حول ١٥ إلي ٣٠ ريال

مزيل العرق

 من لاش LUSH

مسك الطهارة

 من عبدالصمد القرشي آتذكر أخذت ربع تولة حول ٣٠٠ ريال 

♡