نتائج تحدي الـ 30 يوم مع عدسات أكيفيو جونسون أند جونسون ♥

مرحبا حبيبات قلبي *بوسات لكم*

تدوينتنا لليوم راح تكون تكملة لتحدي عدسات أكيفيو جونسون أند جونسون بـ 30 يوم *ياي*
تكلمت من قبل عنها وكيف وليش وكل شيء من معلومات جميلة راح تلاقونها بتدوينتي اللي كتبتها أول - هنا -

طلبوني يكون التحدي الثاني :

تحدي العدسات مع المكياج 

قبل فترة نزلت صورة بالإنستقرام عن عشاء أو عزومة مع أهل بابتي وكانت الصورة لمكياجي في هذاك اليوم :

طبعاً أكيد مستحيل عشاء أو عزومة بنظاراتي إلا لو كانت فاشونيه << لسى ماحصل الشرف بس ناوية عليها قريب إن شاء الله ، أول خطوة سويتها لبست العدسات قبل المكياج طبعاً ، وبدأت بكل خطوات المكياج والأهم اللي باذكرها وتخص موضوعنا للعدسات هي خطوات مكياج العين اللي أكثر شيء أخافه هههه ، هو الكحل والماسكرا والكونسيلر ، الكحل ماستخدمته لأن لحد ألحين ماحصلت أي كحل يناسب عيوني الحساسة * فيس يشاهق * ، وزعت الكونسيلر من تحت عيوني وكنت خايفة لو دخل شوي بعيني تتغبش العدسات مع الكونسيلر والحمدلله ماحصل أي تغبيش ، بعد كذا سويت الآي لاينر واستخدمت الماسكرا ماحسيت بتغبيش أو تغير علي شيء بالرُؤية من خلال العدسات الحمدلله ، ولبست وانطلقت مع أهلي لبيت جدتي ، ومشي اليوم وتونست مع أهلي أعمامي وزوجاتهم وعماتي وجدتي ، طلت فيني بنت عمي قالت رنا عيونك كأنها كبرت شوي لا عاد تسوين رسمة الآي لاينر هذه ، قلت لا ههههه ماهي من رسمة المكياج أنا لابسة عدسات بتحديد رمادي وكذا كأنها كبرت عيني ولا رسمة الآي لاينر المعتادة حقتي ، طبعاً أنا ولله الحمدلله أملك عيون وسيعة عشان كذا لما أسوي رسمة مثلاً توسع العين يصير شكلي مره غلط كل وجهي عيون هههه ، إذا حابين تشوفون كيف شكلها العدسة هذه أرجعوا لموضوعي الأول اللي كتبته - هنا - مره أنصح فيها للي حابه تعطي مظهر بوسع لعيونها ، جلست لابستها من الساعة 5 العصر لين الساعة 1 ونص تقريباً وخلال كل هذه الساعات ماحصل معاي أي مشكلة لا تغبيش ولا إحمرار ولا جفاف ولا أي شيء كل شيء كان معاي 100% ، التجربة كانت جداً ناجحة ، وعشان أكون معاكم إنسانة صريحة تماماً هذه مو أول مرة أجرب فيها هذه العدسات جربتها كثير من قبل مع مكياج وبدون وبحالات كثيرة صراحة يعني النتيجة ماكانت غريبة علي أبداً، الحلو في العدسات هذه من خلال تجاربي اللي أكثر من مرة ، اللي هو غالباً ألبس العدسات قبل أبدأ المكياج وإذا نسيت ألبسها وتذكرت ولبستها ، مره مره مره ما أشيل أي هم في إنو ممكن أخرب مكياجي إذا لبستها ودمعت عيني وساح المكياج وإلخ ، عكس لو كانت عدسة دائمة أو لثلاث شهور اللي هي تحتاج ترجعينها بالعلبة وترجعي تلبسيها ومثلاً نسيت ألبسها لو إيش ما أرجع ألبسها أروح عمياء ولا ألبسها ههههه ، تخيلوا بس كحلي وماسكرا وكل شيء يسيح مع الدموع وأنا لسه مارحت ههههه ، فهذه العدسات اليومية صراحة مرة شيء جميل لكل يوم ولكل مرة وترميها.

تحدي العدسات مع الحركة والرياضة

التحدي الثاني طلبوني يكون ألبسها مع رياضة وحركة ، للأسف ماكان عندي وقت أروح نادي وكذا أجربها فجربتها من خلال البيت ، طبعاً راح يكون مرة مرة صعب تسوين رياضة ولابسة نظارات ههههه ، صراحة ماقد جربت أروح بنظارة لأني أشوف البنات معاي كانوا يلبسونها وكل شوي تطيح عليهم مع النط والجري وتحت فوق وميلي راسك وارفعي راسك ومش عارفة من حركات رياضية مرة ماتجي خصوصاً لو قلتي أوكي بافسخها لين أخلص من الرياضة ومثلاً جيتي متأخر ويكون عندك آيروبيك كلاس وتجين بأخر الصف والمدربة تكون أول شيء يادوبك تشوفينها ومدري كيف آآع << محد كانت تصير له ، نرجع لتجربتي هههه لبست هذه المرة النوع الشفاف بدون تحديد أيضاً تلاقونها بموضوعي سبق وتكلمت عنه - هنا - وفرشت فرشتي لليوغا وشغلت اليوتيوب واسترخيت كذا وبدأت أعمل اليوغا وطلعت كل الطاقات السلبية من جسمي لمدة 50 دقيقة تقريباً ، بعدين خلصت وقمت ماحسيت بدوخة الشيء اللي أخاف منه مرة لما ألبس عدسات ومثلاً في أشياء حركية كثير مدري أحس إني أدوخ هل عشان تحرقني عيوني لما كنت ألبس العدسات اللي تطول أكثر لثلاث شهور مثلاً أو بسبب إذني مدري ، بعد كذا خليتها ماشلتها وجلست مع أهلي لين جاء العصر وخرجت السوق * أحلى شيء بالحياة * تسوقت ومشيت وتعشيت وكل الشغلات هذه أخذت مني من الساعة 12 الظهر لين الساعة 10 الليل وعيوني مية مية ماحسيت بجفاف أبداً أصلاً ماحس في شيء بعيوني بكل أمانه ، وأيضاً عشان أكون صريحة معاكم هذه ماهي تجربتي الأولى مع العدسات في حالات زي كذا ، لما كنت أروح النادي قبل 8 شهور أتوقع كنت ألبسها يومياً وأتحرك مع المدربة ووقتها كنت أول مرة أجربها مع رياضة وكان كل خوفي أحس بدوخة عشاني لابستها بس أبداً ماحسيت وأيضاً كنت أخاف تطير من عيوني مع قوة الحركة << كيف التفكير بس والله تصير ههههه ، بس الحمدلله ماصادفت هواء قوي ههههه ،  مرات من كثر إني ماكنت أحس فيها بعيوني أكمل كل يومي لين أوصل لفراشي وأغمض عيوني وأبدأ أدخل بالحلم حقي إلا وأفز * يالهوي * نسيت أفسخ العدسات << أمانه مين قد صارت له هههههههه اعترفوا مو بس أنا خليكم صريحين .

رأيي بشكل عام عن العدسات صراحة شيء جميل ومرة أحبها وأتوقع كل العالم تعرفها وجربتها ، بجد هي أكثر عدسات ناسبتني وما أقصد العدسات اللي تكون دائمة أو تتلبس لثلاث شهور وتترمي انتبهوا ، أقصد العدسات اليومية اللي تلبسيها مرة وترميها ، هي أكثر شيء ناسب ومناسب وراح يناسب عيوني للأبد ، ماتحمر عيوني ماتغبش وماتجف والأهم بكل شيء عندي ماتغبش وبالتالي تدمع عيوني وتنعدم الرؤية وكمان ماتحمر من كثر ماتحرقني، أما مشكلة الجفاف فحلها بسيط جداً أول ماتحسي إنها بدأت تجف على طول استخدمي قطرات ريفرش ، لأني عارفة في ناس عندها مرض السكر الله يشفيهم يارب فجفاف العين يكون عندهم لا إرادياً هنا يفضل يكون معاك دايماً قطرات ريفرش أو استشيري الطبيب أفضل إذا تناسبك العدسات مع القطرات أو لا لضمان أكثر .

وبكذا يكون خلصت التحدي الحمدلله ، إن شاء الله تكونوا استفدتوا لو حابين معلومات أكثر عن العدسات وكل شيء ، طلوا على موقعهم الرئيسي : www.acuvuearabia.com

قولوا لي تجاربكم بشكل عام مع العدسات ؟

 ♥