عرض : منتجات العناية بالشعر من مكاديميا ♥

عرض : منتجات العناية بالشعر من مكاديميا ♥  

 قبل ثمنية شهور تقريباً نزلت صورة بالانستقرام وكتبت لكم قصة حياتي مع شعري أول وقلت لكم إيش صار فيه وكيف إنحرق من الصبغة وما إلى ذلك من حديث ، وكتبت لكم إني اشتريت هذين المنتجين أكثر منتجين انمدحوا من جميع المجربين وراح يكونون إثبات هل بيرجع شعري زي أول ، قلت لكم شعري كان نفس الشعرة الوحدة سميكة وناعمة وفيها لمعة وتحسين شعري كله على بعضه صحي وغزير وثقيل ماشاء الله ، شعري كان جداً طويل من جد كان مرة طويل لين نص فخذي تقريباً وعشان ما أكذب عليكم أو أبالغ أهلي وصديقاتي وكل الناس اللي تعرفني من زمان تتابعني ذحين،  فما في مجال أبداً إني أكذب أو أبالغ ههههه ، المهم ياحسرتي على الماضي كله هذاك الشعر اختفى لا صحة ولا لمعة ولا طول يعني أوكي معليش صح مو حلو كان طوله شيء يقرف شكله هههه بس مدري كلنا البنات نحب الشعر الطويل صح ؟ ههههه كلها بسبب باربي منذ طفولتنا ، المهم من يوم دخلت الصبغات بيتي والاسترينر والاستشوار ساء للأسوأ شعري ويارب يرجع زي أول وأحسن .

ماسك الإصلاح العميق : 

قوامه : جداً ثقيل ، كأنه زبدة الشيا للجسم ، يتكون من زيت الأرغان والباوبونج والألوا فيرا وغيرهم ، ريحته جداً جميلة وأكيد بتكون مقبولة لجميع الأذواق، وتثبت في الشعر لأكثر من يومين .

طريقة الاستخدام : زي ماهو مكتوب على العلبة " يوضع على الشعر ويترك لمدة 7 دقائق ثم يشطف ، لا داعي لاستعمال الحرارة ، ماسك الإصلاح العميق هو علاج مكثف ، لايستخدم أكثر من مرتين " .

حجمه : أخذت الحجم الكبير 500 مل يكفي لـ 18 شهر من فتح العلبة .

سعره : 180 ريال 

مكان الشراء : من نزيه فرع سوق الأندلس مول .

تجربتي : 

أول ماشتريته اشتريت لنفسي ولأختي كل وحده فينا أخذت شيء ، شعري يختلف عن شعر أختي شعري يعتبر أهون من شعر أختي لأنها أكثر استخداماً لمصففات الشعر ، فجربناها كذا لأسبوعين ، هي على طول قالت رنااا شعري صار مجبس وكذا فريزنق ويتساقط بشكل مو طبيعي لا يكون من المكاديميا قلت لها مدري صراحة كثير بنات كتبوا كذا بالانستقرام بس أنا ماصار لي شيء زي ماهو شعري الحمدلله ، قالت إلا أكيد منه وسحبت عليه وبطلته ، أما أنا كملت عليه وجلست استخدمه مرتين إلى مرة بالأسبوع لمدة 3 شهور ، فجأءه صار شعري يتساقط بكثرة وحسيت إنه منه ، فتوقفت عنه وجلست أطل بشعري ياترى هل حصل تغيير من وقت ما استخدمته ؟ بكل صراحة لا ماحسيت في شيء اختلف بشعري زي ماهو ، جد مرة زعلت ولا كنت فاهمة السبب ليش مازبط على شعري ، وندمت إني أخذت الحجم الكبير يعني خلاص وثقت قلت كل العالم عاجبتها ولما سويت بحث الكل عاجبه ومافي كثير ناس تذمه ، تركته وخليته على جنب وصرت أستخدم أشياء ثانية والحمدلله لاحظت إن التساقط خف بس مازال شعري زي ماهو جاف ومافيه لمعه ، بعد كذا تقريباً بعيد رمضان صبغت شعري بلون واحد كله ، ووقتها من جد من جد حسيته صار جاااف ومتيبس ومتجبس ، مدري اش اللي خلاني وقتها وقلت أوكي يلا خليني أرجع استخدم الماسك يمكن يهون شعري شوي ، واستخدمته وقتها مرتين تقريباً ، والمفاجأه إن من بعد ماغسلت شعري صار يلمع وكذا لونه قوي ومره حلو وملمسه ناعم ، مرة استغربت لدرجة جلست ذيك الفترة بس أخليه كذا بدون استشوار وكيرلي مرة حلو اللفه مو زي أول تكون كذا لفة ملفوفه باهته لا طالعه حلوة وناعمه ومرتبه ، بعدين جلست استخدمه حول شهر ونص ورجع التساقط وتركته على جنب ، ورجع شعري زي أول جاف بس أقل تجبساً وتيبساً ، قبل ثلاث أسابيع صبغت شعري بلون واحد مرة أخرى ، ورجع الموال متجبس وحالته حاله وقلت أوكي يلا أرجع استخدمه واستخدمته من 3 أسابيع وألحين شعري يجنن يلمع ومضبط وناعم والنفشه تخف أكثر .

خلال الثمنية شهور هذه اتضحت لي الرؤية بشكل عام على المنتج :

أول حاجة من طريقة استخدامي لو استخدمته بعد ما أغسل شعري بشامبو وأحطه على الأطراف دقايق وأغسله ماكأني سويت شيء صراحة لكن لو استخدمته بطريقة إنو أغسل شعري وأحطه ع الأطراف وبعدين أخذ غطاء الشعر وأجلس أقشر جسمي وأتروش وأفرش اسناني وكل شيء تسوينه خلال الترويش ههههه وأفتحه وأشطفه بالمويه يظهر المفعول أفضل من لو بس كذا حطيتيه دقايق وغسلتيه بدون تغطيه ليش لأن الحرارة تخليه يتغلل أكثر بالشعر وممكن تستخدمي منشفة تبلليها بموية دافية وتلفيها ع شعرك نفس الطريقة ونفس الشيء .

أنا كنت أبالغ بوصف شعري إنه جاف وحالته حاله اسم الله عليه ماكان فيه إلا العافية عشان كذا خلال الـ 3 شهور الأولى مالاحظت أي ردة فعل أو شيء جميل للمنتج ، لأن كان شعري تقريباً كويس ، طبعاً مو زي شعري زمان بس أفضل بمليون مرة من لو صبغت شعري وصار كذا متجبس والأطراف جافة ومتقصفة وما إلى ذلك، فعشان كذا لما صبغت جف شعري أكثر والأطراف تقصفت أكثر فلاحظت فعالية المنتج عليه أكثر بعد ماصبغته .

أما من ناحية التساقط كانوا البنات يكتبون لي بالانستقرام إنه بسبب السليكون المتواجد في المنتج وعشان ما أخليه يتساقط لازم أستخدم منتج ينظف الشعر منه ومن تراكمات أي مواد كيميائية وتخربه ، الحل تحصلونه بمدونة الجميلة منى ميس بوتيك - هنا - مره مره مهم تقرأون الموضوع قبل تستخدمونه .

وآخر شيء يفضل التنويع بين منتجات الشعر ومانستخدمها لفترة أكثر من 3 شهور فبدلي وغيري عشان شعرك يتنفس ويتجدد ويغير جو شوي هههههه .

 زيت للشعر : 

قوامه : لاتتصورا إنه زيت خفيف أبداً هههه ، ثقيل جداً ، أيضاً ريحته جداً جميلة وأكيد بتكون مقبولة لجميع الأذواق، وتثبت في الشعر لأكثر من يومين .

طريقة الاستخدام : زي ماهو مكتوب على العلبة " للتصفيف واللمسة النهائية ، ضع كمية صغيرة في الشعر الرطب أو الجاف ودلك ، لمزيد من التغذية أضف كمية صغيرة إلى الماسك أو البلسم " .

حجمه : أخذت الحجم الكبير 125 مل يكفي لـ 18 شهر من فتح العلبة .

سعره : 175 ريال 

مكان الشراء : من نزيه فرع سوق الأندلس مول .

تجربتي :

استخدمته تقريباً بشكل أسبوعي وشعري لسه غرقان مرة ، واستخدمه بعد ما أملس شعري كل مره ، منتج جميل وهذه كانت أول تجربه لي مع زيت ثقيل مايحتاج تغسلين شعرك بعد ماتحطيه ، يعني تحطيه ع شعرك وتنتظري كذا شوي إلا هو اختفى ومايبقى غير لمعة حلوة على شعرك ، بكل صراحة المنتج منتج تصفيف فقط يعني هل حسيت في فايدة خلال الثمنية شهور اللي فاتت ؟ لا ، العلبة هذه بقي منها شوي وتخلص بجد استخدمته من قلب ، بس ماحسيت أي شيء ولا أي اختلاف يذكر بشعري عندي الزيوت العاديه زيت لوز وأي زيت ثاني مفعوله يظهر على شعري أحلى ، يمكن عشان كذا هم كاتبين زيت للتصفيف يعني الفكرة منه مثلاً مو علاجي بحته ، الفكرة تكون إنو مثلاً زي أنا لما أملس شعري أو استشوره الأطراف غالباً تكون باهته لأنها جافه وماتوصلها زيوت الشعر الطبيعية من الفروة فهذا الشيء بيكون مرة ممتاز وحلو لو استخدمتيه عشان يغطي لك هذه المشكلة كحل مؤقت يعني زي كأنك تستخدمي اسبراي لتثبيت لفة الشعر بعدين تغسلين شعرك وتروح اللفة ويروح المثبت ، نفس الفكرة هنا ، استخدمته مع الماسك بس بكل صراحة ماحسيت في فرق مرة جامد سواء معاه ولا بدونه ، والحلو فيه هذا الزيت إنه ماسبب لي تساقط أبداً .

ملاحظة مهمه :

إوعك تستخدمي المنتجين على فروة راسك مره انتبهي بس استخدميهم على الأطراف أسفل شعرك .

إوعك تشتري الأحجام الكبيرة قبل تجربيها ، خذي أصغر حجم جربيه عجبك أرجعي خذي الأكبر ولا تخسري فلوس وكمية برودكات ع الفاضي .

هل أنصح بشرائهم ؟ :

شعرك خفيف ؟ دهني ؟ لو إيوا لا ما أنصحك المنتجين مرة ثقيلين وبيخلون شعرك أغلب الوقت هابط مهما لفلفتيه واستشورتيه وبيدهنهم زيادة وماراح يعجبونك .

شعرك طبيعي بس فيه شوية جفاف أو تقصف أو لمعه ؟ صراحة ما أنصحك تشترينهم لأن بإمكانك تستغنين عنهم ، جاف ؟ غذيه بأشياء طبيعية وبيرجع بسرعة ، متقصف ؟ أوكي قصي المتقصف وخلاص مافي أمل أبداً يتصلح المتقصف واهتمي فيه بزيادة ، تبغين لمعه ؟ أيضاً بإمكانك تستبدليهم بأشياء طبيعية أو أي منتجات ثانيه أرخص وأوفر ومايكون فيها سيلكون وخلاص تنحل مشكلتك البسيطة .

شعرك جداً جاف ومغبر وباهت من كثر الصبغ والإستشوارات والمصففات كلها ، هنا أنصحك تاخذيه بس برأيي هو مفعوله مؤقت فقط يعني لا تحلمين تلاقين شيء قدامك على المدى البعيد !! أو مثلاً بيرجع شعرك الأصلي ههههه لا بس بيكون أفضل مما هو عليه حالياً !

 بالنهاية أقول كل تجربة بنت تختلف عن بنت ثانية وزي مايقولوا الأصابيع ماهي سوا ♥

إيش رأيك بمنتجات مكاديميا ؟ هل جربتيها وناسبتك ؟

إيش جربتي منها ؟ وإيش أكثر شيء حبيتيه منها ؟

♥