عرض : سيراميك GHD الذهبي

هلمبو بنات 

قلوب قلوب ♥

حب حب حب حب ♥

بوسات بوسات بوسات بوسات ♥

باتكلم لكم في هذه التدوينة عن سترينر GHD أخذته قبل أربعة شهور وأتوقع هذه فترة كافية للحكم عليه وكتابة تجربتي عنه ، يعني ماراح أكتب لكم قرقر كثير وإنه وإنه ..الخ ، اللي حابه تعرف عنه أكثر ممكن تبحث بقوقل وبتحصل معلومات كثيرة عن بداية الشركة وصناعها ونجاحها ، بس نقطة وحدة باذكرها وهو إنه حائز على جوائز عالمية كأفضل سترينر لتصفيف الشعر المصنع في بريطانيا ، ويستخدمونه بأرقى صالونات بريطانيا دليل على جودته الممتازة و ماراح أكثر كلام لأنها تعتبر غنية عن التعريف واللي ماتعرفها زي ماقلت تسوي سيرش أو بحث بقوقل وإن شاء الله تحصل اللي يرضيها .

النوع اللي أخذته اسمه :

رقم 1 GHD V Gold Classic Professional Styler Hair Straighteners

من :

 نـــزيـــه

سعره :

 890 ريال 

مميزاته :

♥يتميز بلونه الذهبي الجميل مع اللون الأسود وفيه مناطق زخرفية تحسونها تلمع كأنها مصقوله كذا .

♥حجمه صغير وخفيف جداً مايتعب يدك نهائياً .

♥تصميمهم للوح السيراميك بشكل يقلل من حجم الضرر والحرق على شعرك ويعطيه لمعة حلوة .

♥بإمكانك تستخدميه كمُلمّس وكفير لشعرك حاجتين بشيء واحد .

♥يحتاج عشان يسخن أقل من 20 ثانية فقط  .

♥يمتلك خاصية جميلة جداً ومره ونست أبوي وأتوقع كل الرجال تعجبهم ههههه وهي وضع السكون لو نسيتيه 

شغال بعد 30 دقيقة يطفى إلكترونياً.

♥الميزة الآخيره فيه خاصية معرفة نوع شعرك وعليها يقرر درجة حرارة السيراميك

عيوبه :

♥مافيه زر تحكم بدرجة الحرارة للجهاز :( يعني يا أون يا أوف Off-On

تجربتي :

لو بأقارن بينه وبين سيراميك بروان اللي كان معاي لسبع سنين تقريباً أكيد أكيد أكييييييد راح أقول اش كنت أحس فيه لما كنت مستمره استخدمه ! ، يب يب لا تنصدمون مع إني كنت أحب سيراميكي من بروان ههههه،راح أقولكم الفرق والسبب :

♥خلال استخداماتي الكثيرة لسيراميك بروان ، لما أملس شعري أجلس تقريباً ساعة كاملة عشان أخلصه لأن شعري كثيف وطويل فيتعبني كثير ، غير كذا لما أملسه ببروان يكون شعري مرة يلمع وحلو ومضبوط ! بس لما أغسل شعري يالله كيف ! :( أطالع بشعري محروق جداً وباهت وجاف ، أيضاً لما أملس شعري ببروان خلال وقت التمليس لما أخلص أقوم أطالع بالأرض وبملابسي كلها شعري والله لو أجمعها تطلع حول 100 شعرة أو أكثر وكلها تكون كويسة ونازله من الجذور ومعضمها كأنها مقطوعة ومحروقة :(، خلال وقت التمليس أيضاً يدي تتعبني عشان الجهاز كان ثقيل شوي مو مرة بس يعتبر ثقيل على يدي لمدة ساعة .

♥خلال استخداماتي لأربعة شهور لسيراميك جي إتش دي فرق تمااااااماً ، بوسه عليه *مووواه*

أول حاجة حسبتها لما سويت شعري كله مع الانتباه إن شعري طويل وكثيف أخذ مني ربع ساعة فقط كتمليس بيرفكت أما لو سريع سريع فأخذ مني 8 دقايق فقط !! شوفوا الفرق واااه زي اللي مسكينه تعجن بيدها ساعة وتتعب بعدين تشتري آله تعجن لها بسرعه بدقيقة وبدون ماتتعب ههههه ، أيضاً لما أملس شعري وأخلص وبعد التمليس مثلاً استحميت شعري زي ماهو لا جف ولا بهت ولا انحرق الحمدلله ، خلال وقت التمليس بعد ماخلص وأقوم أطالع بشعري بالأرض وحولي ألاقي هاه حوالي 10 شعرات بالأرض طايحة يعني مرة فرررق عن أول بقوة، خلال وقت التمليس ما أحس إني شايلة شيء من خفته مررره خفيف ولا يتعب يدي لو رفعتها ساعة .

مع العلم خلال وقت استخدامي لهم الإثنين أهتم بشعري وأهتم بجسمي من داخل وأيضاً أستخدم حامي أو واقي الحرارة قبل أملسهم سواء ببروان أو بجي إتش إل .

نرجع نكمل عن جي إتش دي :

حبيته كثير من قلبي♥ ، أنا اخترت حجم الكلاسيك راح تحصلون حجم أكبر من الكلاسيك للشعر الطويل وأصغر للشعر القصير ، أول ماشتريته فكيته وشغلته وسويته ورحنا عزومة لبيت عمي والأغلب هزأني ومدري كيف اش فيه شعرك انحرق وكذا وأنا الدنيا تدور فيني قلت ول دفعت 890 ريال على لا شيء ، بس الحقيقة كانت أتوقع عشان أول استخدام أو عشان توه فتح بسم الله استفتحت بيه شعري ، فانتبهوا لما تشترونه جربوا أقل شيء مرة عشان يبدأ يشتغل كويس قبل تروحون مكان هههه ، جربت حركة إنو أسوي فير بشعري طلعت مرة جميلة جداً بس للأسف أنا شعري لما أملسه وبعدين ألفلفه مايضبط على طول خمس دقايق وتطيح لو جبستها بأقوى مثبت سبراي على الأرض < بالغتي يختي هههه ، فلو بغيت ألف لف ممكن تزبط بحالة نادرة وهي لو ع طول مسكت الشعره ولفيتها بدون حركة إنو أول أملسه بعدين ألفلفه ، فهمتوا علي ؟! عشان التمليس قبل اللف مايضبطها لي !

فأحب استخدمه بس إذا بغيت أملس شعري وبعدين ألف لفه من الأطراف بشكل خفيف أو من جوانب شعري قريب من وجهي وبس، شعري ماتضرر منه بنسبة 80% عكس أول مع السيراميك القديم من بروان .

مرفقاته :

جاء معاه غطاء مرة مفيد.

جميل جداً في حال لو كنتي مستعجلة وطفتيه ممكن تقفليه بالغطاء لين يبرد وكل الدنيا تصير أمان بأمان .

بلد التصنيع :
الصين ، أول ماشفت مكتوب بالصين قلت للي يبيع بنزيه كيف كذا وهي شركة بريطانية متأكد هذا الأصلي ، قالي أيوا الأصلي بس مكان التصنيع للشركة صار بالصين ، أصلاً كل شيء صار مكانه بالصين ، بس تحتاجوا تفرقوا بين الأصلي والتقليد فيهم انتبهوا.

طريقة استخدامي له راح أسوي لكم إياه فيديو بإذن الله قريب ولكن بشكل مختصر ألحين :

.

♥تأكدي تماماً مو مدهن ولا مزيت ولا شيء .

♥استخدمي حامي أو واقي الحرارة أي نوع مناسبك وبخيه ع شعرك كله من بعيد بخفه بعدين ركزي ع الأطراف كثير .

♥شغلي السيراميك ماراح يطول معاك بالكثير عشر ثواني وتسمعي صوت * تتن* يعني صار جاهز للإستخدام .

♥قسمي شعرك لأقسام صغيرة صغيرة وامسكي خصلة خصلة بالمشط النحيف ومرري بعدها على الخصلة بالسيراميك من مرة لمرتين لثلاث لين تحصلي النتيجة المطلوبة ، ونصيحتي لا تكثري أكثر من ثلاث تمريرات .

♥بعد كذا أحب أمرر بزيت المكاديميا نقطة وحدة بس ع الأطراف تعطي لمعة حلوة بعد التمليس وإنتي استخدمي أي شيء يناسبك .

لو حبيتي تلفيه راح تلاقي طريقة باليوتيوب هنا وإن شاء الله تفهمي منها لو مافهمتي اكتبي لي تحت وراح أسوي لكم فيديو بإذن الله :

 

وهذه صور للي جربوا السيراميك أو الاسترينر :

وهنا كان عند رغد احتفال  مع صديقاتها وسويته على شعرها بس ماتبغى لف تبغاها ناعم كذا هههههه 

أنا صراحة خفت وأنا أسوي لها شعرها ما أبغى أعدمه وهي طفلة  فكنت أسوي خصله وخصله لا ، لأن بالأصل شعرها ناعم بسم الله عليها فمايحتاج يعني وماكنت أمرر السيراميك أكثر من مره عليه .

الصور بالجوال ♥

وبكذا أكون خلصت التدوينة الحمدلله ♥

أتمنى تكونوا استفدتوا إن شاء الله وإذا عندكم أي استفسارات تفضلوا اكتبوا لي تحت ♥

♥