رمضان ☾ : فلوق اليوم الرابع ✩ وصفات معظم الأكلات الموجودة بالفيديو ♥

♥مرحبا بنات ♥ كيف الحال ♥ رمضان مبارك عليكم يارب☾

أيضاً نكمل وصفات يلا 

نبدأ بالخبز اللي سويته للسحور

أول شيء تاخذيه صامولي عادي أو ممكن صامولي نوع فرنسي يجيك قاسي شوي

بس أفضل ذا الصامولي العادي عشان يجي أطرى ولما يتحمص يتحمص بقرمشة أكثر من إنه قاسي 

تقطيعه بالنص تاخذي ملعقه صغيره جبنه ساييلة ومايونيز وصوص ثوم شوي وتخلطيهم 

وتدهني فيهم الصامولي من فوق

بعد كذا تاخذي شرائح طماطم وتحطيها عليه وهلابينو اللذيذ ع حسب الرغبة 

وبعدين ترشي شوي فلفل أسود وممكن كمون أو كزبرة مطحونة 

وتدخليها الفرن من تحت تشغيل النار فرننا بسرعة يحتر وقوي أخليها من 5 إلى 10 دقايق 

وبسرعة أطلعها لا تنحرق 

بعد كذا أرش جبن مبشور واخليه شوي يذوب ويدفى الساندويتش وبالعاااافية على قلوبكم ♥

نجي لطريقة مكونة الأعواد الصينية :

هذه الأعواد تتسوا بالبخار إذا عندك بخار سويها فيه عشان ماتخرب ومرة قد جربناها بموية طلعت عاديه ترا بس مدري أحس تشرب موية كثير لدرجة لما تتبليها ماتمسك طعم التتبيلة ترا بس أنا اللي لاحظت من أهلي زي ماقلت لكم عندي مشكلة بلساني هههههه المهم إحنا نستخدم ألة البخار صحباتي يقولو نفس اللي تستخدم للمنتو بس ماقد جربنا المنتو عليها ولو أن حقتنا مو زيها اللي تجيك كذا طبقات المهم تسوي المكرونة بالبخار وع جنب تاخذي شوي زبدة وعليها في النار تقطعي جزر بصل ثوم كوسا فلفل رومي وملفوف واللي تبغيه من خضار حطيه عادي أنا ماحطيت لا ملفوف ولا كوسا لأن ماكان عندنا للأسف 

وتحركيهم ع النار بعد كذا تحطي المكرونة بعد ماتنجح من على البخار ع جنب وتاخذي بصينية ثانية شوي زيت وتحمري الدجاج ع حسب الكمية اللي تبغينها وعليها بهارات ع حسب أيضا ماتبغين اللي تبغين ( أسفة بنات أنا كذا شغلي بالطبخ مالي مقدار معين لأن ذوقي وذوق أهلي يختلف كثير عن كتب الطبخ أو الوصفات بشكل عام يعني مثلا نحبها حارة أكثر نحبها مالحة شوي نحبها بدون مرق نحبها مقلية مو مسلوقة زي كذا فا أنا أخذها بالمقدار وماأحكم عليها لا خلاص كل شخص وذوقه فانتي شوفي مقدار التتبيلات والخضروات والكميات اللي تناسبك) بعد كذا بعد ماينجح الدجاج تاخذيه وتحطيه ع الخضروات وأيضاً المكرونة تحطيها عليها وتاخذي ملعقتين صويا مو حلوة عادية وتخليها شوي تطبخ ع النار كذا حول دقيقتين وبعد كذا تاخذي ملعقة من الصويا الحلوة وملعقة صغيره سكر بني وملعقة صغيرة ونص نشا وتخلطيهم كذا لمدة دقيقتين وإذا حسيتها ناشفه حطي شوي موية وطفي النار وقدميها وبالهناء والعافية عليكم يارب♥

مكرونة الفوتشيني ( باستا ألفريدو ) ♥ : 

سويت عنها فيديو تلاقوها هنا تحت 

بعد كذا إحم إحم الشوربة اللي علمتني عليها عمتي سهلة جداً ولذيييييذة 

كأنه مو عاجبك بليز لاتصفقيني إذا عرفتي الطريقة لأنك كنتي أكثر وحدة متحمسة لها هههههههه

المهم 

شوربة السابنخ بالكريمة

تقدري تستخدمي شوربة السابنخ أو شوربة البروكلي الثنتين لذيذاتتتتتت

هذه وقت الأزمات أوف تفك عنك سريع سريع

تاخذي مغلفين من شوربة البروكلي أو السبانخ بالكريمة شركة ماجي متوفرة بكل البقالات والسوبر ماركتات

تحطيها ع النار وقبل ماتغلي تحطي علبة وحدة قشطة كبيرة 

وتحركيها لين تذوب القشطة وخليها لين تغلي وقدميها بالعاااافية لذيذة وسهلة واشكروا عمتي ع سرها الفنان ههههه♥

بعد كذا عندنا كمان فطيرة الجبن 

هذه فطيرة الجبن من يدات أمي الجميلة 

أنا : أمي تعالي نقليني الطريقة لمتابعاتي

أمي : طيب اكتبي 

أنا : حاضر يلا * فيس لابس نظارات*

أمي : أول شيء العجينة ياخذون كاس وثلاث أرباع دقيق أبيض وبنفس الكاس ثلال أرباعه موية دافية لا هي حارة ولا هي باردة 

وملعقة كبيرة خميرة ومبنفس الملعقة بينج بودر وكمان سكر وبنفس الملعقة 3 مرات حليب بودرة 

وفنجال شاهي زيت وتيخلطونها بالعجانة لين تتجانس ويخلونها ساعة تتخمر

بعد كذا ياخذون 4 حبات جبن مثلث ولا كيري وعلبة قشطة وملعقة سكر ويخلطونها ويخلونها ع جنب ويبشرون ربع حبه جبن كرافت أصفر ويخلونهم ع جنب بعد كذا ياخذون صينية دائرية ويدهنونها بالزيت ويقسمون العجينة اللي تخمرت قسمين وياخذون القسم الأول ويفردونه بالصينية ويحطون جبن الكرافت بالأطراف وبعد كذا نحط حشوة الجبن بالنص ويفردونها وياخذون الجزء الثاني من العجين ويفردونه بمقاس الصينية ويحطونه فوق الجبن يعني يقفلونها وبعد كذا تدهن من فوق بالبيض ولا بالحليب السائل ويرشون سمسم ولا حبة بركة ويدخلونها الفرن من تحت لين تستوي وشوي من فوق تتحمر ع خفيف وبعد كذا يقطعونها مثلثات زي البيتزا ويشربونها بالشيرة وبالعافية والهناء ♥

وبس سلامتكم هذه كانت طلباتكم  وألحين باروح أكل جعت من الوصف ههههه

أحبكم ♥